പാക്കിസ്ഥാന് തിരിച്ചടി നല്‍കും എന്ന് ആക്രമണം നടന്ന ദിവസം മുതല്‍ പ്രധാനമന്ത്രിയും ബിജെപി, സംഘപരിവാര്‍ പ്രവര്‍ത്തകരും ആവര്‍ത്തിക്കുന്നതാണ്. കേന്ദ്രം ഭരിക്കുന്ന പാര്‍ട്ടിയുടെയും പാര്‍ട്ടി പ്രവര്‍ത്തകരുടെയും അഭിമാനത്തിന്റെ കൂടി പ്രശ്‌നമാണ് ഒരു തിരിച്ചടി എന്നിരിക്കെ, ഭീകരസംഘടനയ്ക്കും പാക്കിസ്ഥാനും തിരിച്ചടി നല്‍കാനുള്ള ഒരു മാര്‍ഗം അവതരിപ്പിച്ചിരിക്കുകയാണ് ബിജി ഗോപാലകൃഷ്ണന്‍ എന്ന യുവതി.
ചാവേറുകളാകാന്‍ മടിയില്ലാത്ത പാകിസ്ഥാന് ഭീകരരുടെ അതേ ശൈലി തന്നെ എന്തുകൊണ്ട് ഇന്ത്യക്കാര്‍ക്കും സ്വീകരിച്ചു കൂടാ എന്ന ചോദ്യവുമായാണ് യുവതി രംഗത്തെത്തിയിരിക്കുന്നത്. മാത്രമല്ല സംഘപരിവാര്‍ ഈ ഉദ്യമം ഏറ്റെടുക്കണമെന്നും ലക്ഷക്കണക്കിന് വരുന്ന സംഘമിത്രങ്ങള്‍ ഈ പ്രത്യേക സാഹചര്യത്തില്‍ രാജ്യത്തിന് വേണ്ടി ചാവേറാകാന്‍ പ്രതിജ്ഞയെടുക്കണം എന്നും യുവതി പറയുന്നു. ബിജി ഗോപാലകൃഷ്ണന്‍ എന്ന യുവതിയാണ് സംഘപരിവാര്‍ നേതാക്കളോട് ചാവേറായി പ്രവര്‍ത്തിച്ച് പാകിസ്ഥാന് തിരിച്ചടി നല്‍കാന്‍ ആവശ്യപ്പെടുന്നത്.
മോഹന്‍ ഭഗവത്, യോഗി ആദിത്യനാഥ്, സാധ്വി പ്രാച്ചി, സാധ്വി സരസ്വതി, സാക്ഷി മഹാരാജ്, പ്രവീണ്‍ തൊഗാഡിയ, ഉദ്ദവ് താക്കറെ തുടങ്ങിയ ഉത്തരേന്ത്യന്‍ സംഘമിത്രങ്ങള്‍ മുതല്‍ ഇങ്ങ് കേരളത്തിലെ ശശികല, പ്രതീഷ് വിശ്വനാഥ്, കെ സുരേന്ദ്രന്‍, സെന്‍കുമാര്‍ ഉള്‍പ്പെടെയുള്ള എല്ലാ സംഘ നേതാക്കളും ചാവേറാകാന്‍ നേതൃത്വം കൊടുക്കണം എന്നാണ് ബിജി ഗോപാലകൃഷ്ണന്‍ ഫേസ്ബുക്കില്‍ കുറിക്കുന്നത്.
യുവതിയുടെ ഫേസ്ബുക്ക് പോസ്റ്റിന്റെ പൂര്‍ണ്ണരൂപം:
പാക്കിസ്ഥാന് ഭീകരരുടെ ആക്രമണത്തില്‍ കൊല്ലപ്പെട്ട ധീരജവാന്‍മാരുടെ വേര്‍പാടില്‍ രാജ്യം നടുങ്ങി നില്‍ക്കുന്ന ഈ വേളയില്‍ ഒരു തിരിച്ചടി കൊടുക്കേണ്ടത് അനിവാര്യമാണ്. ചാവേറുകളാകാന്‍ മടിയില്ലാത്ത പാക്കിസ്ഥാന് ഭീകരരുടെ അതേ ശൈലി തന്നെ എന്തുകൊണ്ട് ഇന്ത്യക്കാര്‍ക്കും സ്വീകരിച്ചു കൂടാ….??!
ദേശസ്നേഹത്തിന്റെ കാര്യത്തില്‍ വിട്ടുവീഴ്ച്ചയില്ലാത്ത സമീപനം സ്വീകരിക്കുന്ന സംഘ്പരിവാര്‍ ഈ ഉദ്യമം ഏറ്റെടുക്കണം. നിങ്ങള്‍ക്കു മാത്രമേ അതിന് കഴിയു. ലക്ഷ കണക്കിന് വരുന്ന സംഘമിത്രങ്ങള്‍ ഈ പ്രത്യേക സാഹചര്യത്തില്‍ രാജ്യത്തിന് വേണ്ടി ചാവേറാകാന്‍ പ്രതിജ്ഞയെടുക്കണം. തുടര്‍ന്ന് പാക്കിസ്ഥാനില്‍ നുഴഞ്ഞു കയറി ഭീകരര്‍ പാര്‍ക്കുന്ന ഓരോ മുക്കിലും മൂലയിലും സംഘ മിത്രങ്ങള്‍ ചാവേറായി പൊട്ടിതെറിക്കണം.
മോഹന്‍ ഭഗവത്, യോഗി ആദിത്യനാഥ്, സാധ്വി പ്രാച്ചി, സാധ്വി സരസ്വതി, സാക്ഷി മഹാരാജ്, പ്രവീണ്‍ തൊഗാഡിയ, ഉദ്ദവ് താക്കറെ തുടങ്ങിയ ഉത്തരേന്ത്യന്‍ സംഘമിത്രങ്ങള്‍ മുതല്‍ ഇങ്ങ് കേരളത്തിലെ ശശികല, പ്രതീഷ് വിശ്വനാഥ്, കെ സുരേന്ദ്രന്‍, സെന്‍കുമാര്‍ ഉള്‍പ്പെടെയുള്ള എല്ലാ സംഘ നേതാക്കളും ചാവേറാകാന്‍ നേതൃത്വം കൊടുക്കണം.
അങ്ങനെ അവസാന ഭീകരനും ചത്തൊടുങ്ങുമ്പോള്‍ ഭീകരരും ഭീകരതയുമില്ലാത്ത സന്തോഷവും സമാധാനവും നിറഞ്ഞ ഇന്ത്യാ മഹാരാജ്യം പുലരും. കാലങ്ങളായി ജനങ്ങള്‍ അവജ്ഞയോടെ നിങ്ങളെ കുറിച്ച് പറയുന്ന ‘സ്വാതന്ത്ര്യ സമരത്തെ ഒറ്റുകൊടുത്തവര്‍, വെള്ളക്കാരുടെ ഷൂ നക്കി മാപ്പ് പറഞ്ഞവര്‍ ‘ തുടങ്ങിയ ഇതുവരെയുള്ള എല്ലാ പേരുദോഷങ്ങളും നിങ്ങളെ വിട്ടൊഴിഞ്ഞ് രാജ്യവും ജനങ്ങളും എന്നും നിങ്ങളോട് കടപ്പെട്ടിരിക്കും.
