പിറവം: വീടിന്‍റെ ഭിത്തിയിൽ തലയിടിച്ച് വൃദ്ധൻ മരിച്ചു. മകനെ പോലീസ് തെരയുന്നു. പിറവം ദേവീപ്പടിക്കു സമീപം കിഴക്കേൽ വർഗീസ് (മത്തച്ചൻ-80) ആണ് മരണപ്പെട്ടത്. ഇലക്‌ട്രോണിക്സ് മെക്കാനിക്കായ മകൻ ജയിംസ് സംഭവത്തിനു ശേഷം ഒളിവിലാണ്.
സംഭവത്തെക്കുറിച്ച് പോലീസ് പറയുന്ന തിങ്ങനെ: മദ്യപിച്ചെത്തിയ മകൻ ജയിംസും വർഗീസുമായി ഇന്നു രാവിലെ തർക്കമുണ്ടായി. തുടർന്ന് ജയിംസ് വർഗീസിനെ അടിച്ചുവീഴ്ത്തുകയും തല ഭിത്തിയിലിടിപ്പിച്ച് കൊലപ്പെടുത്തുകയുമായിരുന്നു. ഇന്നു രാവിലെ 8.45ന് വീടിനുള്ളിൽവച്ചായിരുന്നു സംഭവം. ഈ സമയം വർഗീസിന്‍റെ ഭാര്യ തെയ്യാമ്മയും ജയിംസിന്‍റെ മൂന്നു മക്കളും വീട്ടിലുണ്ടായിരുന്നു.
ബഹളംകേട്ടെത്തിയ സമീപവാസികൾ ഉടൻ വർഗീസിനെ ആശുപത്രിയിലേക്കു മാറ്റിയെങ്കിലും രക്ഷിക്കാനായില്ല. സംഭവത്തിനുശേഷം സ്ഥലത്തുനിന്നു കാറുമായി മുങ്ങിയ ജയിംസ് ഒളിവിലാണ്. വർഗീസിന്‍റെ മൃതദേഹം പിറവത്തെ സ്വകാര്യആശുപത്രിയിൽ സൂക്ഷിച്ചിരിക്കുകയാണ്. സ്ഥലത്തെത്തിയ പിറവം പോലീസ് അന്വേഷണം ആരംഭിച്ചു. സ്ഥിരം മദ്യപാനിയായ ജെയിംസ് മിക്ക ദിവസങ്ങളിലും വീട്ടിൽ ബഹളം ഉണ്ടാക്കാറുണ്ടെന്നു സമീപവാസികൾ പറഞ്ഞു.
