കോഴിക്കോട്: രക്തദാനത്തിനു തടസം നേരിടാത്ത വിധം കോവിഡ് വാക്സിനേഷൻ ക്രമീകരിക്കണമെന്ന് കേരള ബ്ലഡ് പേഷ്യന്‍റ്സ് പ്രൊട്ടക്‌ഷൻ കൗൺസിൽ ആവശ്യപ്പെട്ടു.
രണ്ടാമത്തെ ഡോസ് വാക്സിൻ എടുത്തു കഴിഞ്ഞാൽ രക്തദാനത്തിന് 28 ദിവസം വരെ കാത്തിരിക്കേണ്ടതുണ്ടെന്നാണ് ഈ രംഗത്തെ വിദഗ്ധർ പറയുന്നത്.
ഈ സഹചര്യത്തിൽ രക്തദാതാക്കളെല്ലാവരും കൂട്ടത്തോടെ വാക്സിൻ എടുക്കുന്നത് രക്തം ലഭിക്കാതെയുള്ള മരണങ്ങൾക്കിടയാക്കുമെന്ന് ആശങ്കയുണ്ട്.
തലാസീമിയ പോലുള്ള രോഗികൾ പതിനഞ്ച് ദിവസം കൂടുമ്പോൾ രക്തം ആവശ്യമുള്ളവരാണ്.
വാക്സിൻ എടുക്കുന്ന ദാതാക്കൾ അറുപതും എഴുപതും അതിലധികവും ദിവസങ്ങൾ രക്തദാനത്തിൽനിന്നു മാറിനിൽക്കേണ്ടിവരുന്നത് രക്തം ആവശ്യമുള്ള രോഗികളെ അങ്ങേയറ്റം ദുരിതത്തിലാക്കും.
കോവിഡ് വ്യാപനം സാർവത്രികമായതോടെ രൂക്ഷമായ രക്തക്ഷാമമാണ് രക്തബാങ്കുകളിൽ അനുഭവപ്പെടുന്നത്.
ഈ സഹചര്യത്തിൽ രക്തദാനം മുടങ്ങാതെ വാക്സിനേഷൻ പരിപാടി ക്രമീകരിക്കാൻ നടപടിയുണ്ടാവണം.
രക്തബാങ്കുകളിൽ പൂർണസുരക്ഷയൊരുക്കിയ സാഹചര്യത്തിൽ നിർഭയമായി രക്തദാനം നടത്താൻ ദാതാക്കൾ മുന്നോട്ടു വരണമെന്നും കൗൺസിൽ അഭ്യർഥിച്ചു.
