ഡബ്ല്യൂഡബ്ല്യൂഇ താരം ബ്രേ വയറ്റ് ഹൃദയാഘാതത്തെ തുടര്‍ന്ന് അന്തരിച്ചു. മൂന്ന് തവണ ഡബ്ല്യൂഡബ്ല്യൂഇ ലോക ചാമ്പ്യനായ അദ്ദേഹം ജനുവരിയില്‍ മൗണ്ടന്‍ ഡ്യൂ പിച്ച് ബ്ലാക്ക് മാച്ചില്‍ എല്‍എ നൈറ്റിനെതിരെ വിജയിച്ചതിന് ശേഷം പിന്നീട് മത്സരിച്ചിട്ടല്ല.
ബ്രേ വയറ്റിന്‍റെ യഥാര്‍ഥ പേര് വിന്‍ഡം റൂത്തന്‍ഡ എന്നാണ്. റിപ്പോര്‍ട്ടുകള്‍ പ്രകാരം മടങ്ങിവരാന്‍ അനുമതി ലഭിച്ചതിന് ശേഷം താന്‍ ഒരു തിരിച്ചുവരവിനായി ഒരുങ്ങുകയാണെന്ന് വയറ്റ് പറഞ്ഞിരുന്നു. എന്നാല്‍ ഗുസ്തിക്ക് അനുമതി ലഭിച്ചെങ്കിലും അസുഖത്തെ തുടര്‍ന്ന് അദ്ദേഹത്തിന്‍റെ ആരോഗ്യ അവസ്ഥയുടെ കാര്യത്തില്‍ ഡബ്ല്യൂഡബ്ല്യൂഇ മുന്‍കരുതലുകള്‍ സ്വീകരിച്ചിരുന്നു.
പാതിവഴിയിൽ തന്‍റെ പ്രിയതമയെ ഉപേക്ഷിച്ചാണ് ബ്രേ വയറ്റ് യാത്രയായത്. ഗുസ്തിക്കാരിയായ ജോജോ ഓഫര്‍മാനാണ് വയറ്റിന്‍റെ പ്രതിശ്രുധ വധു. മുന്‍ ബേസ്‌ബോള്‍ താരം ജോസ് ഓഫര്‍മാന്‍റെ മകളാണ് ജോജോ. ഇരുവരും തമ്മിലുള്ള വിവാഹം നടക്കാനിരിക്കെയാണ് ബ്രേ വയറ്റിന്‍റെ വിയോഗം.
ഇരുവരുടെ വിവാഹ നിശ്ചയത്തെക്കുറിച്ച് ജോജോ തന്നെയാണ് സോഷ്യല്‍ മീഡിയയിലൂടെ വെളിപ്പെടുത്തിയത്. 2017ലാണ് ആദ്യ ഭാര്യ സാമന്ത റൊട്ടുണ്ടയുമായി ബ്രേ വയറ്റ് വിവാഹമോചനം നേടുന്നത്. ഈ ബന്ധത്തിൽ രണ്ട് പെണ്‍മക്കളാണ് ഉള്ളത്. ബ്രേ വയറ്റിനും ജോജോയ്ക്കും രണ്ട് കുട്ടികളുമുണ്ട്.
