ഈരാറ്റുപേട്ട: ഈരാറ്റുപേട്ട -തൊടുപുഴ റോഡിൽ മേലുകാവിന് സമീപം പാണ്ടിയമാവിൽ സ്വകാര്യ ബസുകൾ തമ്മിൽ കൂട്ടിയിടിച്ച് വിദ്യാർഥികൾ അടക്കം 12 പേർക്ക് പരിക്ക്. പരിക്കേറ്റവരെ പാലാ, തൊടുപുഴ എന്നിവിടങ്ങളിലെ സ്വകാര്യ ആശുപത്രികളിൽ പ്രവേശിപ്പിച്ചു. ആരുടെയും നില ഗുരുതരമല്ല എന്നാണ് പ്രാഥമിക റിപ്പോർട്ട്.
ഇന്നു രാവിലെ 7.30നാണ് അപകടം. ബിപിൻസ്, അന്ന ബസുകളാണ് കൂട്ടിയിടിച്ചത്. കയറ്റവും വളവുകളുമുള്ള ഈ ഭാഗത്ത് ഇറക്കം ഇറങ്ങി വന്ന സ്വകാര്യ ബസ് നിയന്ത്രണം വിട്ട് എതിരേ വന്ന ബസിൽ ഇടിക്കുകയായിരുന്ന. ഇടിയുടെ ആഘാതത്തിൽ ഇരുബസുകളുടെയും മുൻവശത്തെ ഗ്ലാസുകൾ തകർന്നു. ബ്സിന്‍റെ മുൻഭാഗം പൂർണമായി തകർന്നു.
സംരക്ഷണ ഭിത്തിയും ക്രാഷ്ബാരിയറുമുണ്ടായിരുന്നതിനാൽ താഴ്ചയേറിയ കൊക്കയിലേക്ക് മറിയാതെ വൻ ദുരന്തത്തിൽ നിന്ന് രക്ഷപ്പെട്ടു. ബിപിൻസ് ബസ് ഈരാറ്റുപേട്ടയിൽ നിന്ന് തൊടുപുഴയ്ക്കും അന്ന ബസ് തൊടുപുഴയിൽ നിന്ന് ഈരാറ്റുപേട്ടയിലേക്കും പോവുകയായിരുന്നു. അപകട വിവരമറിഞ്ഞ് ഓടിയെത്തിയ നാട്ടുകാരാണ് രക്ഷാ പ്രവർത്തനം നടത്തിയത്.
