കോയന്പത്തൂർ: ഹൈവേയിൽ ബസുകളുടെ മരണപ്പാച്ചിലിനു പണികിട്ടി. ഡ്രൈവിംഗിന്‍റെ അടിസ്ഥാന തത്വങ്ങളെ കാറ്റിൽപ്പറത്തി മത്സരിച്ചോടിയ ബസുകളുടെ ദൃശ്യം സമൂഹമാധ്യമങ്ങളിൽ വൈറലായതോടെയാണ് പിടിവീണത്. കോയന്പത്തൂർ- പൊള്ളാച്ചി റൂട്ടിൽ ഹൈവേയിൽ മത്സരിച്ചോടുന്ന രണ്ടു ബസുകളുടെ ദൃശ്യം ബൈക്ക് യാത്രികനാണ് പകർത്തിയത്. സംഭവം വിവാദമായതോടെ ഇരു ബസ് ഡ്രൈവർമാരുടെയും ലൈസൻസ് റദ്ദാക്കിയതായും വിവരം.
അപകട ഡ്രൈവിംഗിനു ഇരുവർക്കെതിരേയും കേസ് രജിസ്റ്റർ ചെയ്തു. അറ്റകുറ്റപ്പണി നടക്കുന്ന റോഡിലൂടെയാണ് അതിസാഹസികമായി ബസുകൾ ഓടിച്ചിരുന്നത്. യാത്രക്കാരുടെ ജീവൻ വിലക്കെടുക്കാതെ ഡ്രൈവർമാർ നടത്തിയ മത്സരഓട്ടം വൻ പ്രതിഷേധത്തിനും ഇടയാക്കിയിട്ടുണ്ട്.
