കോഴിക്കോട് : കൊതുകിനെ പേടിച്ച് സ്റ്റാന്‍ഡില്‍ നിന്ന് ബസ് മാറ്റിയിട്ട ഡ്രൈവറെ മദ്യപിച്ച് വാഹനമോടിച്ചതിന്‍റെ പേരില്‍ പോലീസ് പൊക്കി. ഒമേഗ ബസിലെ ഡ്രൈവറും എരമംഗലം സ്വദേശിയുമായ റഫീക്കിനെയാണ് കസബ പോലീസ് അറസ്റ്റ് ചെയ്തത്.
ഇന്നലെ രാത്രിയാണ് സംഭവം. ട്രിപ്പ് കഴിഞ്ഞ് മൊഫ്യൂസില്‍ ബസ്റ്റാന്‍ഡില്‍ ബസ് നിര്‍ത്തിയിട്ടതായിരുന്നു. എന്നാല്‍ രാത്രി ഏറെ വൈകി സ്റ്റാന്‍ഡില്‍ നിര്‍ത്തിയിട്ട ബസ് ഒരാള്‍ ഓടിച്ചു പോവുന്നത് മാനേജരുടെ ശ്രദ്ധയില്‍പെട്ടു. ഉടന്‍ തന്നെ മാനേജര്‍ കസബ പോലീസില്‍ വിവരമറിയിക്കുകയായിരുന്നു.
മൊഫ്യൂസിൽ സ്റ്റാൻഡിൽനിന്ന് പോലീസിന്‍റെ ടിവി അടുത്തിടെ മോഷണം പോയതിന്‍റെ നാണക്കേട് നിലനിൽക്കെ പെട്ടെന്ന് ജാഗരൂകരായ പോലീസ് കുതിച്ചെത്തി. മാവൂര്‍റോഡ് വഴി എത്തിയപ്പോള്‍ ബസ് അരയിടത്തുപാലം ഭാഗത്തേക്ക് പോയതായി അറിഞ്ഞു.
ബസിനെ പിന്തുടര്‍ന്നെത്തിയ പോലീസ് നിര്‍ത്താന്‍ ആവശ്യപ്പെട്ടു. ഡ്രൈവറോട് കാര്യങ്ങള്‍ അന്വേഷിക്കുന്നതിനിടെ ബസ് മോഷ്ടിച്ചതല്ലെന്നും ബസിന്‍റെ ഡ്രൈവറാണ് താനെന്നും റഫീക്ക് പോലീസിനോട് പറഞ്ഞു.
മൊഫ്യൂസില്‍ ബസ്റ്റാന്‍ഡില്‍ കൊതുകു ശല്യം കാരണം ബസ് മാറ്റയിടുകയായിരുന്നുവെന്നും ഇയാള്‍ പോലീസിനോട് പറഞ്ഞു. സംഭാഷണത്തിനിടെ ഡ്രൈവര്‍ മദ്യപിച്ചതായി പോലീസിന് സംശയം തോന്നി.
തുടര്‍ന്ന് നടത്തിയ പരിശോധനയില്‍ ഡ്രൈവര്‍ മദ്യപിച്ചിരുന്നതായി കണ്ടെത്തുകയും പോലീസ് നടപടി സ്വീകരിക്കുകയുമായിരുന്നു.
