കോഴിക്കോട്: രാഹുല്‍ഗാന്ധി വയനാട് സീറ്റ് ഒഴിയാന്‍ തീരുമാനിച്ചതോടെ പുതിയ സ്ഥാനാർഥി ആരെന്ന ചർച്ചകള്‍ കോൺഗ്രസിൽ സജീവം. പ്രിയങ്കാ ഗാന്ധി വയനാട് മത്സരിക്കുമെന്നാണ് കെപിസിസി നേതൃത്വം പ്രതീക്ഷിക്കുന്നത്. പ്രിയങ്ക ഇല്ലെങ്കില്‍ കോൺഗ്രസിലെ മുസ്‌ലിം നേതാക്കള്‍ക്ക് അവസരം ലഭിക്കും.
ഉത്തർപ്രദേശിലെ റായ്ബറേലി സീറ്റ് നിലനിർത്താന്‍ രാഹുല്‍ തീരുമാനിച്ചതോടെ വയനാട് ലോക്സഭാ സീറ്റില്‍ ഉപതെരഞ്ഞെടുപ്പ് ഉറപ്പായി. രാഹുലിനു പകരം പ്രിയങ്കാ ഗാന്ധി തന്നെ മത്സരിക്കാനെത്തുമെന്നാണ് കേരളത്തിലെ കോൺഗ്രസ് നേതൃത്വം കരുതുന്നത്. നിലവില്‍ പ്രിയങ്ക താത്‍പര്യം അറിയിച്ചിട്ടില്ല. തെരഞ്ഞെടുപ്പ് പ്രഖ്യാപിച്ചാല്‍ ഇക്കാര്യം ഹൈക്കമാന്‍ഡ് ഗൗരവത്തോടെ ചർച്ച ചെയ്യുമെന്നാണു വിവരം.
പ്രിയങ്കാ ഗന്ധി ഇല്ലെങ്കില്‍ കേരളത്തിലെ നേതാക്കളിലേക്കു ചർച്ച വരും. തൃശൂരിലെ തോല്‍വിയിൽ പാർട്ടി നേതൃത്വത്തോട് അതൃപ്തിയുള്ള കെ. മുരളീധരന്‍ വയനാട്ടില്‍ മത്സരിക്കണമെന്ന ആഗ്രഹം കെപിസിസി നേതൃത്വത്തിനുണ്ട്. എന്നാല്‍, താത്‍പര്യമില്ലെന്ന് കെപിസിസി അധ്യക്ഷന്‍ കെ. സുധാകരനോട് മുരളീധരന്‍ വ്യക്തമാക്കിയിട്ടുണ്ട്.
മുസ്‌ലിം സ്ഥാനാർഥിക്ക് കൂടുതല്‍ വിജയ സാധ്യതയുള്ള വയനാട്ടില്‍ മുസ്‌ലിം സ്ഥാനാർഥിയെ മത്സരിപ്പിക്കണെന്ന അഭിപ്രായം മുസ്‌ലിം സംഘടനകള്‍ക്കുണ്ട്. സംസ്ഥാനത്ത് പൊതുവെയും മലബാറില്‍ പ്രത്യേകിച്ചും മുസ്‌ലിം വോട്ടർമാർ നല്കിയ പിന്തുണ പരിഗണിച്ചാവണം വയനാട്ടിലെ സ്ഥാനാർഥി നിർണയം എന്നാണ് മുസ്‌ലിം സംഘടനകള്‍ ആവശ്യപ്പെടുന്നത്.
യുഡിഎഫ് കണ്‍വീനർ എം.എം. ഹസന്‍, കെപിസിസി സെക്രട്ടറി കെ.പി. നൗഷാദലി, ജനറല്‍ സെക്രട്ടറി ആര്യാടന്‍ ഷൗക്കത്ത് എന്നിവരുടെ പേരുകളാണ് സ്ഥാനാർഥി ചർച്ചകളില്‍ ഉയർന്നുകേള്‍ക്കുന്നത്.
സമസ്ത ഉള്‍പ്പെടെ മുസ് ലിം സംഘടനകളുമായി ബന്ധമുള്ള കെ.പി. നൗഷാദലിയോടാണ് മുസ്‌ലിം സംഘടനകള്‍ക്കു താത്പര്യമെന്നാണ് സൂചന. എം.ഐ. ഷാനവാസിനു പിൻഗാമിയായി പുതിയ നേതാവിനെ വളർത്തിക്കൊണ്ടുവരാനുള്ള അവസരത്തെ ഉപയോഗപ്പെടുത്തണമെന്നും സംഘടനകള്‍ക്ക് അഭിപ്രായമുണ്ട്.
