പൂച്ചയെയും എലിയെയും കുറിച്ച് ചിന്തിക്കുമ്പോൾ തന്നെ ഇരുവരും തമ്മിലുള്ള ശത്രുതയായിരിക്കും ആദ്യം നമുക്ക് ഓർമ വരുന്നത്. പൂച്ച വേട്ടക്കാരനും എലി ഇരയുമാണെന്നാണ് പറയപ്പെടുന്നത്. എന്നാൽ ഇന്‍റർനെറ്റിൽ വൈറലാകുന്ന ഒരു വീഡിയോ ഈ ആശയത്തെ വെല്ലുവിളിക്കുകയാണ്. സാധാരണയിൽ നിന്നും വിപരീതമായി ഒരു പൂച്ചയും എലിയും കളിക്കുന്നതും സുഖമായി ഉറങ്ങുന്നതുമാണ് വീഡിയോയിൽ കാണുന്നത്.
ഒരു പൂച്ച എലിയെ കൈകാലുകൾ ഉപയോഗിച്ച് പിടിക്കാൻ ശ്രമിക്കുന്നത് കാണിച്ചാണ് വീഡിയോ ആരംഭിക്കുന്നത്. കൈയെത്തും ദൂരത്തുനിന്ന എലിയെ പൂച്ച പിടിക്കാൻ ശ്രമിക്കുന്നുണ്ട്. ഇതിന് പിന്നാലെ കാണിക്കുന്ന ദൃശ്യങ്ങളിൽ എലി പൂച്ചയുടെ മുൻകാലുകൾക്കിടയിൽ ഇരുന്നു ഉറങ്ങുന്നതും കാണാം. പൂച്ചയുടെ മുഖം എലിയുടെ തൊട്ടടുത്താണ്, പക്ഷേ എലിയും പൂച്ചയും ശാന്തമായാണ് കിടക്കുന്നത്.
ഉറങ്ങുന്ന പൂച്ചയിൽ നിന്ന് എലിക്ക് എളുപ്പത്തിൽ രക്ഷപ്പെടാൻ കഴിയും, പക്ഷേ അനങ്ങാതെ എലി അവിടെ കിടക്കുകയാണ് ചെയ്തത്. ഈ വീഡിയോ മെയ് 29 ന് ആണ് ഇൻസ്റ്റഗ്രാമിൽ പോസ്റ്റ് ചെയ്തത്. ഇതിനോടകം തന്നെ വീഡിയോയ്ക്ക് 19 ലക്ഷത്തിലധികം ലൈക്കുകൾ ലഭിച്ചു. ടോം ആൻഡ് ജെറി കാർട്ടൂണിൽ കാണാൻ ആഗ്രഹിച്ച ഒരു കാഴ്ചയാണിതെന്നാണ് വീഡിയോയ്ക്ക വന്ന ഒരു കമന്‍റ്.
പൂച്ചയും എലിയും സുഹൃത്തുക്കളായി മാറുന്നത് ഇത് ആദ്യത്തെ രേഖപ്പെടുത്തപ്പെട്ട സംഭവമല്ല. 2009-ൽ, രഞ്ജ് എന്ന പൂച്ചയും പീനട്ട് എന്ന എലിയും അവരുടെ അതുല്യമായ ബന്ധത്താൽ ആഗോള ശ്രദ്ധ നേടി. രണ്ട് മൃഗങ്ങളെയും ദത്തെടുത്തത് അമേരിക്കക്കാരിയായ മാഗി സ്‌പോട്ട് എന്ന സ്ത്രീയാണ്.
