പേരൂര്‍ക്കട: ബാങ്കിനു മുന്നില്‍ പൂച്ചകളുടെ ജഡം കൊണ്ടിട്ടതില്‍ പ്രതിഷേധവുമായി നാട്ടുകാർ. ഇന്നലെ രാവിലെയാണ് വട്ടിയൂര്‍ക്കാവ് കാഞ്ഞിരംപാറ ഫെഡറല്‍ ബാങ്കിനു മുന്നില്‍ പൂച്ചകളുടെ ജഡം കണ്ടത്.
വട്ടിയൂര്‍ക്കാവ് പോലീസ് അന്വേഷണം ആരംഭിച്ചു. മുമ്പും ബാങ്കിനു സമീപം സാമൂഹിക വിരുദ്ധര്‍ പൂച്ചയുടെ ജഡം കൊണ്ടിട്ടിട്ടുണ്ടെന്നു ജീവനക്കാര്‍ പറയുന്നു.
സാധാരണ ബാങ്ക് അവധി ദിവസങ്ങളിലാണ് ജഡങ്ങള്‍ കാണാറുള്ളതെന്നും ബാങ്ക് തുറക്കുന്നദിവസം ജീവനക്കാര്‍ എത്തുമ്പോഴാണ് വിവരം അറിയുന്നതെന്നുമാണ് ഇവര്‍ പറയുന്നത്.
അതിനിടെ പൂച്ചകളുടെ ജഡം കണ്ടതോടെ ബാങ്കിലെത്തിയവരും പ്രദേശവാസികളും പ്രതിഷേധിച്ചു. സ്ഥലത്തെ സിസിടിവി ദൃശ്യങ്ങള്‍ കേന്ദ്രീകരിച്ച് അന്വേഷണം നടത്താനാണ് തീരുമാനമെന്ന് വട്ടിയൂര്‍ക്കാവ് പോലീസ് അറിയിച്ചു.
