ചാലക്കുടി: ബിവറേജിലേക്ക് മദ്യം വാങ്ങാൻ വരുന്നവരുടെ വാഹനങ്ങളുടെ തിരക്കുമൂലം മെയിൻ റോഡിൽ ഗതാഗത സ്തംഭനം.
ചാലക്കുടി നോർത്ത് ജംഗ്ഷനും ആനമല ജംഗ്ഷനുമിടയ്ക്കുള്ള ഭാഗത്താണു വൻ ഗതാഗത കുരുക്ക് അനുഭവപ്പെടുന്നത്. ആനമല ജംഗ്ഷനു സമീപമത്തെ ബിവറേജ് ഔട്ട്‌ലെറ്റിലേക്കു മദ്യം വാങ്ങാൻ നൂറുകണക്കിനു വാഹനങ്ങളാണു വരുന്നത്.
ഔട്ട്‌ലെറ്റിലേക്കു പോകുന്ന വാഹനങ്ങളും മദ്യം വാങ്ങിവരുന്നവരുടെ വാഹനങ്ങളും മെയിൻ റോഡിലേക്കു തിരിയുന്ന ഭാഗത്തുള്ള തിരക്കുമൂലമാണു ഗതാഗത സ്തംഭനം അനുഭവപ്പെടുന്നത്.
ഇതുകൂടാതെ ബിവറേജിലേക്കു വാഹനങ്ങൾ കടത്തിക്കൊണ്ടു പോകാനുള്ള ബുദ്ധിമുട്ടു മൂലം മെയിൻ റോഡിന്‍റെ ഇരുവശത്തും ഇരുചക്ര വാഹനങ്ങളും മറ്റു വാഹനങ്ങളും പാർക്ക് ചെയ്യുന്നതും കുരുക്കിനിടയാക്കുന്നു.
ബിവറേജ് ഔട്ട്‌ലെറ്റിലേക്ക് ഇന്നലെ മദ്യം വാങ്ങാനുള്ളവരുടെ വലിയ തിരക്കായിരുന്നു. കോവിഡ് മാനദണ്ഡങ്ങൾ പാലിക്കാതെയാണു ജനക്കൂട്ടം മദ്യംവാങ്ങാൻ കൂട്ടംകൂടി നിന്നിരുന്നത്.
