പുതുപ്പള്ളി ഉപതെരഞ്ഞെടുപ്പില്‍ വിജയം ഉറപ്പിച്ച് യുഡിഎഫ് സ്ഥാനാര്‍ഥി ചാണ്ടി ഉമ്മന്റെ കുതിപ്പ്. 2021ലെ നിയമസഭാ തെരഞ്ഞെടുപ്പില്‍ ഉമ്മന്‍ചാണ്ടി നേടിയ 9044 വോട്ടിന്റെ ഭൂരിപക്ഷം ഇതിനോടകം മറികടന്ന ചാണ്ടി ഉമ്മന്‍, ഉമ്മന്‍ ചാണ്ടി 2011ല്‍ നേടിയ മണ്ഡലത്തിലെ സര്‍വകാല റിക്കാര്‍ഡ് മറികടക്കുമെന്നാണ് പ്രതീക്ഷിക്കുന്നത്.
2011ലെ തെരഞ്ഞെടുപ്പില്‍ 33,255 വോട്ടിന്റെ ഭൂരിപക്ഷമാണ് ഉമ്മന്‍ചാണ്ടി നേടിയത്. സിപിഎമ്മിന്റെ സുജ സൂസന്‍ ജോര്‍ജായിരുന്നു അന്നത്തെ എതിരാളി.
പിന്നീടിങ്ങോട്ട് ഉമ്മന്‍ചാണ്ടിയുടെ എതിരാളിയായി മാറി ശക്തമായ മത്സരം കാഴ്ചവച്ച ജെയ്ക് സി തോമസിന് പക്ഷെ ഇക്കുറി പച്ച തൊടാനായില്ല.
6000നടുത്ത് ഭൂരിപക്ഷത്തോടെ അയര്‍ക്കുന്നം വിജയിച്ചു തുടങ്ങിയ ചാണ്ടി ഉമ്മന്റെ ലീഡ് ഇതിനോടകം 25000 പിന്നിട്ടിരിക്കുകയാണ്. അകലക്കുന്നത്തും കൂരോപ്പടയിലും സ്ഥിതി വ്യത്യസ്ഥമായിരുന്നില്ല.
കഴിഞ്ഞ തവണ ജെയ്ക്ക് ലീഡ് ചെയ്ത ബൂത്തുകളിലെല്ലാം ഇത്തവണ അദ്ദേഹത്തിന് വലിയ തിരിച്ചടിയാണ് ലഭിച്ചിരിക്കുന്നത്. അദ്ദേഹത്തിന്‍റെ വീടിരിക്കുന്ന മണർകാട്ട് പോലും ജെയ്ക്ക് പിന്നിൽ പോകുന്ന കാഴ്ചയാണ് കാണാൻ സാധിക്കുന്നത്.
