ഒരു കാലത്ത് മലയാളികളുടെ മനസു കീഴടക്കിയ സീരിയലായിരുന്നു സ്വന്തം. ഈ സീരിയലിലെ വില്ലത്തിയും നായികയുമായിരുന്ന സാന്ദ്രാ നെല്ലിക്കാടനെ മറക്കാന്‍ മലയാളികള്‍ക്ക് കഴിയില്ല. ഈയൊരൊറ്റ സീരിയലിലൂടെ ചന്ദ്ര ലക്ഷ്മണന്‍ സാന്ദ്രയായി പ്രേക്ഷകരുടെ മനസിലിടം നേടി. എന്നാല്‍ കഴിഞ്ഞ കുറേ നാളുകളായി മലയാളിയ്ക്ക് ഈ നടിയേക്കുറിച്ച് ഒരു അറിവുമില്ല. കെ കെ രാജീവിന്റെ മഴയറിയാതെ എന്ന സീരിയലിലായിരുന്നു അവസാനമായി ചന്ദ്ര അഭിനയിച്ചത്. അതിനു ശേഷം മലയാളത്തില്‍ സജീവമല്ലെങ്കിലും തമിഴിലും തെലുങ്കിലും സജീവമായിരുന്നു എന്നു ചന്ദ്ര പറയുന്നു. അമ്മ നടത്തുന്ന കണ്ടംപററി മ്യൂറല്‍ ബിസിനസില്‍ സഹായിക്കുകയാണ് താരമിപ്പോള്‍. ചിത്രരചനയില്‍ താല്‍പ്പര്യമുള്ള ചന്ദ്രയുടെ അമ്മയാണു ബിസിനസിന്റെ പ്രധാന ചുമതലക്കാരി.
ബിസിനസ് വിപുലപ്പെടുത്തുന്നതിന്റെ ഭാഗമായാണ് ചന്ദ്ര അമ്മയ്‌ക്കൊപ്പം കൂടുന്നത്. ജീവിതത്തില്‍ ചില മാറ്റങ്ങള്‍ക്ക് ഒരുങ്ങുകയാണ് താന്‍ എന്ന ചന്ദ്ര പറയുന്നു. ഇപ്പോള്‍ 33 വയസായി, ഈ വര്‍ഷം വിവാഹം നടത്തണമെന്നാണ് വീട്ടുകാരുടെ താല്‍പ്പര്യം എന്നും ആലോചനകള്‍ നടക്കുന്നുണ്ട്, ചന്ദ്ര പറയുന്നു. ചക്രത്തില്‍ വിദ്യാബാലനു വേണ്ടി മാറ്റി വച്ച കഥാപാത്രത്തെ അവതരിപ്പിച്ചിരുന്നത് ചന്ദ്രയായിരുന്നു. ഇനിയും സിനിമയില്‍ ഓര്‍മ്മിക്കപ്പെടുന്ന കഥാപാത്രങ്ങള്‍ ചെയ്യണമെന്നു തന്നെയാണ് ലക്ഷ്യം എന്നും ചന്ദ്ര പറയുന്നു. എന്നാല്‍ സീരിയലും സിനിമയും ഒരുമിച്ച കൊണ്ടു പോകുന്നത് അത്ര എളുപ്പമുള്ള കാര്യമല്ലെന്നും അതുകൊണ്ട് ബ്രേക്ക് അനിവാര്യമാണെന്നും ചന്ദ്ര വ്യക്തമാക്കുന്നു. ഒരു പ്രമുഖ മാധ്യമത്തിന് നല്‍കിയ അഭിമുഖത്തിലാണ് ചന്ദ്രയുടെ ഈ വെളിപ്പെടുത്തല്‍.
