ഐപിഎല്‍ ട്വന്‍റി-20 ക്രിക്കറ്റിന്‍റെ 2025 സീസണില്‍ ചേസിംഗ് കിംഗ് ആരെന്ന ചോദ്യത്തിന് ഒരുത്തരം മാത്രം; മുംബൈ ഇന്ത്യന്‍സിന്‍റെ സൂപ്പര്‍ താരം സൂര്യകുമാര്‍ യാദവ്. 18-ാം സീസണിലെ 41 മത്സരങ്ങള്‍ പൂര്‍ത്തിയായപ്പോള്‍ സൂര്യകുമാര്‍ യാദവ് നേടിയത് 373 റണ്‍സ്. അതില്‍ 304ഉം ചേസിംഗ് ഇന്നിംഗ്‌സില്‍നിന്ന്. മറ്റൊരു ബാറ്റര്‍ക്കും ചേസിംഗില്‍ 250 റണ്‍സ് കടക്കാന്‍പോലും സാധിച്ചില്ല എന്നതും ശ്രദ്ധേയം, ചേസിംഗ് കിംഗിന്‍റെ കിരീടം സൂര്യക്കു സ്വന്തം…
7 ഇന്നിംഗ്‌സ്, 304 റണ്‍സ്
മുംബൈ ഇന്ത്യന്‍സ് ഒമ്പതു മത്സരങ്ങള്‍ പൂര്‍ത്തിയാക്കിയപ്പോള്‍ സൂര്യകുമാര്‍ യാദവ് നേടിയത് 373 റണ്‍സ്. ഒമ്പത് ഇന്നിംഗ്‌സിലും സൂര്യകുമാര്‍ ക്രീസില്‍ എത്തി. ചെന്നൈ സൂപ്പര്‍ കിംഗ്‌സിന് എതിരായ രണ്ടാം മത്സരത്തില്‍ നേടിയ 68 നോട്ടൗട്ടാണ് ഉയര്‍ന്ന സ്‌കോര്‍. ആകെ നേരിട്ടത് 224 പന്ത്. സ്‌ട്രൈക്ക് റേറ്റ് 166.51. അര്‍ധസെഞ്ചുറി രണ്ട്. അടിച്ച ഫോര്‍ 38, സിക്‌സ് 19. മൂന്നു തവണ പുറത്താകാതെ നിന്നു. മൂന്ന് നോട്ടൗട്ടും ചേസിംഗ് ഇന്നിംഗ്‌സില്‍.
ചേസിംഗിലെ ഏഴ് ഇന്നിംഗ്‌സില്‍ സൂര്യകുമാര്‍ നേടിയത് 304 റണ്‍സ്. 170 പന്തില്‍നിന്നാണിത്. 31 ഫോറും 16 സിക്‌സും ചേസിംഗില്‍ സൂര്യയുടെ ബാറ്റില്‍നിന്നു പിറന്നു. ശരാശരി 76. സ്‌ട്രൈക്ക് റേറ്റ് 178.82. ചേസിംഗില്‍ സൂര്യകുമാറിന്‍റെ ഇന്നിംഗ്‌സുകള്‍ ഇങ്ങനെ: ഗുജറാത്ത് (28 പന്തില്‍ 48), കോല്‍ക്കത്ത (9 പന്തില്‍ 27 നോട്ടൗട്ട്), ലക്‌നോ (43 പന്തില്‍ 67), ബംഗളൂരു (26 പന്തില്‍ 28), സണ്‍റൈസേഴ്‌സ് (15 പന്തില്‍ 26, 19 പന്തില്‍ 40 നോട്ടൗട്ട്), ചെന്നൈ (30 പന്തില്‍ 68 നോട്ടൗട്ട്).
ബട്‌ലര്‍, രോഹിത്
18-ാം സീസണില്‍ (ആദ്യ 41 മത്സരങ്ങള്‍ പൂര്‍ത്തിയായപ്പോള്‍) ചേസിംഗില്‍ 200ല് കൂടുതല്‍ റണ്‍സ് നേടിയ മറ്റു രണ്ടു ബാറ്റര്‍മാരാണ് ഗുജറാത്ത് ടൈറ്റന്‍സിന്‍റെ ജോസ് ബട്‌‌ലറും മുംബൈ ഇന്ത്യന്‍സിന്‍റെ രോഹിത് ശര്‍മയും. ബട്‌ലര്‍ നാല് ഇന്നിംഗ്‌സില്‍ 224 റണ്‍സ് ചേസിംഗില്‍ സ്വന്തമാക്കി. രോഹിത് ശര്‍മ ആറ് ഇന്നിംഗ്‌സില്‍ 210ഉം.
റോയല്‍ ചലഞ്ചേഴ്സ് ബംഗളൂരുവിന്‍റെ വിരാട് കോഹ്‌ലി (3 ഇന്നിംഗ്‌സില്‍ 194), ചെന്നൈ സൂപ്പര്‍ കിംഗ്‌സിന്‍റെ രചിന്‍ രവീന്ദ്ര (6 ഇന്നിംഗ്‌സില്‍ 182), ഡല്‍ഹി ക്യാപ്പിറ്റല്‍സിന്‍റെ കെ.എല്‍. രാഹുല്‍ (4 ഇന്നിംഗ്‌സില്‍ 180) എന്നിവരാണ് ചേസിംഗ് ഇന്നിംഗ്‌സില്‍ ഇതുവരെ ഏറ്റവും കൂടുതല്‍ റണ്‍സ് നേടിയ മറ്റു ബാറ്റര്‍മാര്‍.
കണ്‍സിസ്റ്റന്‍സി
ഈ ഐപിഎല്ലില്‍ കണ്‍സിസ്റ്റന്‍സിയിലും സൂര്യകുമാര്‍ യാദവിനെ വെല്ലാന്‍ ആളില്ല. 2025 സീസണില്‍ ഒരിക്കല്‍പ്പോലും സൂര്യയുടെ സ്‌കോര്‍ 25നു താഴെപ്പോയിട്ടില്ല. ഐപിഎല്‍ ചരിത്രത്തില്‍ ഒരു സീസണില്‍ തുടര്‍ച്ചയായി 25+ സ്‌കോര്‍ നേടിയതില്‍ രണ്ടാം സ്ഥാനത്താണ് സൂര്യകുമാര്‍.
2014 സീസണില്‍ തുടര്‍ച്ചയായി 10 ഇന്നിംഗ്‌സില്‍ 25+ സ്‌കോര്‍ നേടിയ റോബിന്‍ ഉത്തപ്പയാണ് ഇക്കാര്യത്തില്‍ സൂര്യകുമാറിനു മുന്നില്‍ ഉള്ളത്. ഐപിഎല്‍ 2025 സീസണില്‍ സൂര്യകുമാറിന്‍റെ ഇതുവരെയുള്ള ഇന്നിംഗ്‌സ്: 29 (ചെന്നൈ), 48 (ഗുജറാത്ത്), 27* (കോല്‍ക്കത്ത), 67 (ലക്‌നോ), 28 (ബംഗളൂരു), 40 (ഡല്‍ഹി), 26 (ഹൈദരാബാദ്), 68* (ചെന്നൈ), 40* (ഹൈദരാബാദ്).
അനീഷ് ആലക്കോട്
