ചവറ: നിയന്ത്രണം വിട്ട ലോറി ഇടിച്ച് വാഹനങ്ങൾക്കും കടയ്ക്കും കേട് പാട് സംഭവിച്ചു.ദേശീയപാതയിൽ ചവറ തട്ടാശേരി ജംഗ്ഷന് സമീപം രാവിലെ 8.30 ഓടെയായിരുന്നു അപകടം.
എറണാകുളത്തു നിന്നും കന്യാകുമാരിയിലേക്ക് പോകുകയായിരുന്നു ലോറി. എതിരെ വരികയായിരുന്ന കാറിനെ ഇടിക്കാതിരിക്കാൻ ശ്രമിക്കുന്നതിനിടയിലാണ് അപകടം.ഏകദേശം 60 മീറ്ററോളം ദൂരം പോയ ശേഷമാണ് ലോറി നിന്നത്.
സമീപമുണ്ടായിരുന്ന സ്കൂട്ടറും മൂന്ന് സൈക്കിളുകളും അപകടത്തിൽ തകർന്നു.തട്ടാശേരി ജംഗ്ഷന് സമീപം ഹോട്ടൽ നടത്തിവരുന്ന തിരുമല്ലവാരം സ്വദേശി ഓമനക്കുട്ടന്‍റെ സ്കൂട്ടറും ചായ കുടിക്കാൻ വന്നവരുടെ സൈക്കിളുകളുമാണ് തകർന്നത്.
കൂടാതെ ചെറുശേരി ഭാഗം സ്വദേശി കുഞ്ഞുകൃഷ്ണപിള്ളയുടെ പെട്ടിക്കടയും തകർന്നു.ലോറി നിയന്ത്രണം വിട്ട് വരുന്നത് കണ്ട് അവിടെയുണ്ടായിരുന്നവർ ഓടി മാറിയതിനാൽ വൻ ദുരന്തം ഒഴിവായി.
അപകടത്തെ തുടർന്നു ലോറി ഡ്രൈവർ തമിഴ്നാട് സ്വദേശി ശെൽവത്തിന് പരിക്കേറ്റു.
