പത്തനംതിട്ട: പ്ലാസ്‌റ്റിക്കിനോടു വിട പറഞ്ഞ് പിണങ്ങി തുണിസഞ്ചിയുമായി ചങ്ങാത്തം കൂടുകയാണ് ചെന്നീർക്കര എസ്‌എൻഡിപി എച്ച്‌എസ്‌എസ്‌ വിദ്യാർഥികൾ. ലിറ്റിൽ കൈറ്റ്സ് യൂണിറ്റിന്‍റെ നേതൃത്വത്തിൽ തുണിസഞ്ചികൾ നിർമിച്ച് നൽകിയാണ്‌ പ്രവർത്തനം. സ്‌കൂളിനുള്ളിൽ ഒതുങ്ങി കൂടാതെ “പ്ലാസ്റ്റിക് ഫ്രീ ചെന്നീർക്കര’ എന്ന കാന്പെയ്നുമായി കുട്ടികൾ മുന്നേറുകയാണ്.
പ്ലാസ്റ്റിക് ഉപയോഗത്തിന്‍റെ ദോഷവശങ്ങൾ വിവരിച്ച് ബോധവത്കരണ ക്ലാസുകൾ എടുത്തതിനുശേഷമാണ്‌ തുണിസഞ്ചി വിതരണം ചെയ്യുന്നത്. ക്രിസ്‌മസ് അവധിക്കാലത്ത് നിർമിച്ച തുണിസഞ്ചികൾ പുതുവത്സര ദിനത്തിൽ സ്കൂൾ ഹെഡ്‌മിസ്‌ട്രസ്‌ എസ്. ഷീബയ്ക്ക് ലിറ്റിൽ കൈറ്റ്സ് പ്രതിനിധികൾ നൽകി.
പരിസരത്തുള്ള കടകളിലും സമീപപ്രദേശത്തുള്ള സ്കൂളുകളിലും നാട്ടുകാർക്കും സൗജന്യമായി തുണിസഞ്ചികൾ എത്തിക്കുന്നു. “പ്ലാസ്റ്റിക്കിനോട് പിണങ്ങാം’ എന്ന പരസ്യചിത്രവും യൂണിറ്റിന്‍റെ നേതൃത്വത്തിൽ ഒരുങ്ങിക്കഴിഞ്ഞു. പ്രവർത്തനങ്ങൾക്ക് കൈറ്റ് മിസ്‌ട്രസ്‌ അഞ്‌ജു പ്രസാദ് നേതൃത്വം നൽകി.
