നെന്മാറ: വീടിന് എതിർവശത്ത് താമസിക്കുന്ന നീളൻ മുടിയുള്ള സ്ത്രീയാണ് കുടുംബ കലഹത്തിന് കാരണമെന്ന് ജോത്സ്യൻ പറഞ്ഞതിന് പിന്നാലെയാണ് ചെന്താമര 2019ൽ സജിതയെ കൊലപ്പെടുത്തിയതെന്ന് അദ്ദേഹത്തിന്‍റെ അമ്മാവൻ. ചെന്താമര മന്ത്രവാദത്തിന് അടിമയാണെന്നും കിട്ടുന്ന പണമെല്ലാം ഉപയോഗിച്ച് പൂജകൾ ചെയ്യാറുണ്ടെന്നും അമ്മാവൻ പറഞ്ഞു.
‘‘ചെന്താമര അന്ധവിശ്വാസത്തിന് അടിമയാണ്. കുറച്ച് പൈസ കൈയിൽ കിട്ടിയാൽ പൂജയ്ക്കും മന്ത്രവാദത്തിനുമെല്ലാം ഉപയോഗിക്കും. ഒരിക്കൽ ജോത്സ്യനെ കണ്ടപ്പോഴാണ് വീടിന്‍റെ എതിർവശത്ത് താമസിക്കുന്ന നീളൻ മുടിയുള്ള സ്ത്രീയാണ് കുടുംബപ്രശ്നങ്ങൾക്ക് കാരണമെന്ന് പറഞ്ഞത്. പിന്നാലെയാണ് അവൻ സജിതയെ വെട്ടിക്കൊലപ്പെടുത്തിയത്. ചെന്താമരയെ സഹിക്കാൻ വയ്യാതെയാണ് ഭാര്യ വീടു വിട്ട് പോയതെന്ന് ചെന്താമരയുടെ അമ്മായി പറഞ്ഞു.
പ്രതി ജാമ്യവ്യവസ്ഥ ലംഘിച്ചു; പോലീസിനെതിരേ റിപ്പോർട്ട്
നെന്മാറ: സജിത കൊലക്കേസ് പ്രതിയായ ചെന്താമര ജാമ്യവ്യവസ്ഥ ലംഘിച്ചാണ് നെന്മാറയില്‍ എത്തിയത്. ഒന്നരമാസം മുമ്പ് കേസില്‍ ജാമ്യം ലഭിച്ച ചെന്താമരയോട് നെന്മാറ പഞ്ചായത്തില്‍ പ്രവേശിക്കരുതെന്ന് ജാമ്യ വ്യവസ്ഥയില്‍ നിര്‍ദേശിച്ചിരുന്നു.
ഇതു ലംഘിച്ചാണ് പ്രതി കഴിഞ്ഞ 45 ദിവസമായി നെന്മാറയിലെ സ്വന്തം വീട്ടില്‍ കഴിഞ്ഞിരുന്നത്. അതിനിടെ സുധാകരന്‍റെ കുടുംബത്തിനെതിരെ ചെന്താമര കൊലവിളി മുഴക്കിയിട്ടും കേസെടുക്കാതിരുന്നത് നെന്മാറ പോലീസിന്‍റെ ഭാഗത്തുനിന്നുള്ള ഗുരുതര വീഴ്ചയെന്ന് കണ്ടെത്തി.
സംസ്ഥാന സ്‌പെഷല്‍ ബ്രാഞ്ചാണ് നെന്മാറ പോലീസിനെതിരെ റിപ്പോര്‍ട്ട് നല്‍കിയിരിക്കുന്നത്. ഒരു മാസം മുന്പ് സുധാകരനും കുടുംബവും ചെന്താമരയ്‌ക്കെതിരെ പരാതി നല്‍കിയിട്ടും നടപടിയെടുക്കാതെ ഇയാളെ ശാസിച്ചു വിടുകയാണ് പോലീസ് ചെയ്തതെന്നും സ്‌പെഷല്‍ ബ്രാഞ്ച് റിപ്പോര്‍ട്ടില്‍ പറയുന്നുണ്ട്.
ഇതോടെ നെന്മാറ പോലീസ് സ്റ്റേഷനിലെ ഉദ്യോഗസ്ഥര്ക്കെതിരെ നടപടി വന്നേക്കും. പോലീസിന്‍റെ അനാസ്ഥയില്‍ പ്രതിഷേധിച്ച് സ്റ്റേഷനിലേക്ക് കോണ്‍ഗ്രസ് ഇന്നു രാവിലെ പ്രതിഷേധ മാര്‍ച്ച് നടത്തി.
ചെന്താമരയെ പാലക്കാട് നഗരത്തില്‍ കണ്ടെന്ന് അഭ്യൂഹം
പാലക്കാട്: നെന്മാറ ഇരട്ടക്കൊലക്കേസിലെ പ്രതി ചെന്താമരയെ പാലക്കാട് നഗരത്തില്‍ കണ്ടെന്ന് അഭ്യൂഹം. ജില്ലാ പോലീസ് മേധാവിക്കാണ് ഇതുസംബന്ധിച്ച് വിവരം ലഭിച്ചത്.
തുടര്‍ന്ന് നഗരത്തിലെ ലോഡ്ജുകളിലും ഹോട്ടലുകളിലും പരിശോധന നടത്തി. ബസ് സ്റ്റാന്‍ഡുകള്‍, റെയില്‍വേ സ്‌റ്റേഷനുകള്‍ എന്നിവയിലും പരിശോധനയും നിരീക്ഷണവും ശക്തമാക്കി.
