ഇന്ത്യയിൽ റിക്കാർഡുകൾ വാരിക്കൂട്ടിയ ദംഗൽ ചൈനയിൽ റിലീസ് ചെയ്തതോടെ കളക്‌ഷൻ റിക്കാർഡുകൾ തിരുത്തിക്കുറിച്ചിരുന്നു. ഇപ്പോഴിതാ ദംഗലിന്‍റെ നേട്ടത്തിലേക്കു വീണ്ടുമൊരു റിക്കാർഡ് തിളക്കം. 2017ൽ ചൈനയിൽ റിലീസ് ചെയ്ത ചിത്രങ്ങളിൽ ഏറ്റവും മികച്ച സിനിമ എന്ന റിക്കാർഡാണ് ഇപ്പോൾ ദംഗലിനെ തേടിയെത്തിയിരിക്കുന്നത്. ബോക്സ് ഓഫീസ് കളക്‌ഷനിൽ മികച്ച നേട്ടം കൊയ്ത ദംഗലിന് ഐഎംഡിബി നടത്തിയ വാർഷിക സർവേയിലാണ് മികച്ച സിനിമ പട്ടം ലഭിച്ചത്.
ആഭ്യന്തര മാർക്കറ്റിനെ മറികടന്ന് ആഗോള മാർക്കറ്റിൽ മികച്ച നേട്ടം കൊയ്ത ആദ്യ സിനിമയാണ് ആമിർ ഖാൻ കേന്ദ്രകഥാപാത്രത്തെ അവതരിപ്പിച്ച ദംഗൽ. ഇന്ത്യക്കൊപ്പം ചൈനയിലും ബോക്സ് ഓഫീസ് ഹിറ്റായിരുന്ന ദംഗല്‌ അമേരിക്ക, കാനഡ, യുകെ, ഓസ്ട്രേലിയ, യുഎഇ, തായ്‌വാൻ തുടങ്ങിയ രാജ്യങ്ങളിലും മികച്ച നേട്ടം കൊയ്തു. കഴിഞ്ഞ ജൂലൈയിൽ ആഗോളതലത്തിൽ 2,000 കോടി രൂപ നേടിയെന്ന് ചിത്രത്തിന്‍റെ അണിയറപ്രവർത്തകർ പ്രഖ്യാപിച്ചിരുന്നു.
ഇന്ത്യൻ ഗുസ്തിതാരം മഹാവീർ സിംഗ് ഫോഗാട്ടിന്‍റെയും അദ്ദേഹത്തിന്‍റെ മക്കളായ ഗീത, ബബിത എന്നിവരുടെയും കഥ പറയുന്ന ദംഗൽ 2016 ഡിസംബർ 23നാണ് റിലീസ് ചെയ്തത്.
