സ്വന്തം ലേഖിക
കൊച്ചി: മഞ്ഞുപെയ്യുന്ന ക്രിസ്മസ് രാവുകളുടെ അലങ്കാരമാണ് മിന്നിത്തെളിയുന്ന നക്ഷത്രങ്ങൾ. ഓരോ വർഷവും ക്രിസ്മസ് വിപണിയിൽ ഒരു ഹിറ്റ് താരം ഉണ്ടാകും. ഇത്തവണത്തെ വിപണിയില്‍ താരമായിരിക്കുന്നത് മിന്നല്‍ മുരളിയാണ്.
മള്‍ട്ടി ഷേഡില്‍ ഒരു മിന്നല്‍ പോലെ ഇതളുകളിലേക്ക് വെളിച്ചം പാഞ്ഞെത്തുന്ന ഈ നക്ഷത്രത്തിന് സൂപ്പര്‍ ലുക്കാണ്. ഫ്‌ളൂറസെന്‍റ് പേപ്പറില്‍ നിര്‍മിച്ചിരിക്കുന്ന മിന്നല്‍ മുരളി 11, ഒമ്പതു മൂലകളുള്ള വാല്‍ നക്ഷത്രമാണ്. മിന്നലിനെ അനുസ്മരിപ്പിക്കുന്ന രീതിയിലുള്ള ഈ നക്ഷത്രം പിങ്ക്, നീല നിറങ്ങളില്‍ ലഭ്യമാണ്. 180 രൂപയാണ് മിന്നല്‍ മുരളിയുടെ വില.
കുറുപ്പും മരക്കാറും
കുറുപ്പിനെ വാങ്ങണമെങ്കില്‍ 120 രൂപ മുടക്കണം. കുറുപ്പ് എന്ന പേരില്‍ മള്‍ട്ടി കളറില്‍ പൂ പോലെയിരിക്കുന്ന ഈ നക്ഷത്രം നീല, ചുവപ്പ്, ഗോള്‍ഡന്‍, ബ്രൗണ്‍ എന്നീ നിറങ്ങളില്‍ ലഭ്യമാണ്.
മരയ്ക്കാര്‍ അറബിക്കടലിന്‍റെ സിംഹം എന്ന പേരിലുള്ള മരയ്ക്കാര്‍ നക്ഷത്രങ്ങളാണ് മറ്റൊരു ട്രെന്‍ഡി ഇനം. പതിനൊന്നു മൂലകളുള്ള ഈ നക്ഷത്രം മിന്നല്‍പ്പിണര്‍ പോലെ ടി ഷേപ്പില്‍ തിളങ്ങും. വെളുത്ത ബട്ടര്‍ പേപ്പറിലുള്ള മരയ്ക്കാര്‍ക്കും ഫാന്‍സ് കൂടുതല്‍ ഉണ്ട്. ഇവയ്ക്ക് അല്‍പം വില കൂടും. 220 രൂപയാണ് മരയ്ക്കാരുടെ വില.
തായ്‌ലന്‍ഡ് നക്ഷത്രങ്ങൾ
തായ്‌ലന്‍ഡ് മോഡല്‍ നക്ഷത്രങ്ങള്‍ക്കും വിപണിയില്‍ ഡിമാന്‍ഡ് ഉണ്ട്. ഏഴും അഞ്ചും മൂലകളുള്ള തായ്‌ലന്‍ഡ് നക്ഷത്രങ്ങള്‍ ബ്ലാക്ക് ഷേഡില്‍ വിവിധ ഡിസൈനുകളില്‍ ലഭിക്കും. തുണിത്തരങ്ങളില്‍ പ്രിന്‍ഡ് ഡിസൈന്‍ വരുന്നതുപോലെയാണ് ഇവയുടെ നിര്‍മിതി. ജംബോ സൈസ് നക്ഷത്രങ്ങളാണ് മറ്റൊരു ട്രെന്‍ഡ്. രണ്ടു വലിയ നക്ഷത്രങ്ങളേക്കാള്‍ വലുപ്പം വരും ഇവയ്ക്ക്. കൊമ്പന്‍ സ്റ്റാറുകളാണ് മറ്റൊരു വെറൈറ്റി ഐറ്റം.
ഏഴു മൂലകളുള്ള മള്‍ഡി ഷേഡ് വൈറ്റ് ബട്ടര്‍ പേപ്പറില്‍ നിര്‍മിച്ചിരിക്കുന്ന കൊമ്പന്‍ സ്റ്റാറിന് 250 രൂപ വരും. സിനിമകളുടെ പേരുകളിലുളള നക്ഷത്രങ്ങള്‍ക്കു പുറമേ അഞ്ചു മൂലകളുള്ള വാല്‍ നക്ഷത്രത്തിന്റെ വാലില്‍ മണി പിടിപ്പിച്ച മോഡലിനും ആവശ്യക്കാരുണ്ട്. പ്രകാശം വരുമ്പോള്‍ നീലയും ചുവപ്പും നിറത്തിലുള്ള ഈ മണികള്‍ തിളങ്ങും.
വെളുത്ത നിറത്തിലുള്ള നക്ഷത്രങ്ങളോടുള്ള പ്രിയത്തിന് ഒട്ടും കുറവു വന്നിട്ടില്ലെന്ന് എറണാകുളം ബ്രോഡ്വെ കൊളുത്തറ അനശ്വര പേപ്പര്‍ ആന്‍ഡ് സ്റ്റേ‌ഷനറി ഷോപ്പിലെ സെയില്‍സ്മാന്‍ അരുണ്‍ വി. നാഥ് പറഞ്ഞു. ബട്ടര്‍ പേപ്പറില്‍ പ്രിന്‍റ് വരുന്ന രീതിയിലാണ് ഇവയുടെ ഡിസൈന്‍.
ഏഴ്, പതിനൊന്ന് മൂലകളില്‍ വാല്‍ ഉള്ളതും ഇല്ലാത്തതും ഈ കൂട്ടത്തിലുണ്ട്.കഴിഞ്ഞ വര്‍ഷം ട്രെന്‍ഡിയായിരുന്ന നിയോണ്‍ നിറങ്ങളിലുള്ള നക്ഷത്രങ്ങള്‍ ഇത്തവണയും വിപണിയിലുണ്ട്. വിവിധ ആകൃതികളിലുള്ള ഈ നക്ഷത്രങ്ങള്‍ക്ക് 150 രൂപ മുതലാണ് വില. 50 രൂപ മുതല്‍ 300 രൂപവരെയുള്ള നക്ഷത്രങ്ങളാണ് വിപണിയിലുള്ളത്.
