നെടുങ്കണ്ടം: തേര്‍ഡ്ക്യാമ്പില്‍ രാത്രിയില്‍ വീട്ടിലെത്തിയ മൂര്‍ഖന്‍ പാമ്പ് വീട്ടുകാരുടെ ഉറക്കം കെടുത്തി. മണിക്കൂറുകളോളം ഭീതി പടര്‍ത്തിയ പാമ്പിനെ സ്‌നേക് കാച്ചറുടെ സഹായത്തോടെ പിടികൂടി.
രാത്രി ഏഴരയോടെയാണ് തേര്‍ഡ്ക്യാമ്പ് നെല്ലിക്കമണ്ണില്‍ ജോയി വര്‍ഗീസിന്‍റെ വീട്ടില്‍ മൂര്‍ഖന്‍ പാമ്പ് എത്തിയത്.
വീട്ടിനോടു ചേര്‍ന്ന വർക്ക് ഏരിയയില്‍ പത്തി വിടര്‍ത്തി നില്‍ക്കുന്ന നിലയിലാണ് പാമ്പിനെ കണ്ടത്. ഉടന്‍തന്നെ വീട്ടുകാര്‍ കല്ലാര്‍ ഫോറസ്റ്റ് സെക്ഷന്‍ ഓഫീസില്‍ വിവരം അറിയിച്ചു.
എട്ടോടെ സ്ഥലത്തെത്തിയ വനപാലകസംഘം സ്‌നേക് കാച്ചർ ഷുക്കൂറിന്‍റെ സഹായത്തോടെ പാമ്പിനെ പിടികൂടി കൂട്ടിലാക്കി. രാത്രി 12.30 ഓടെയാണ് പാമ്പിനെ പിടികൂടാനായത്.
തുടര്‍ന്ന് തേക്കടിയില്‍ എത്തിച്ച മൂര്‍ഖനെ പുലര്‍ച്ചെ നാലോടെ വനമേഖലയില്‍ തുറന്നുവിട്ടു. അഞ്ചടി നീളമുള്ള പെണ്‍ മൂര്‍ഖനാണ് പിടിയിലായതെന്ന് കല്ലാര്‍ ഫോറസ്റ്റ് സെക്ഷന്‍ ഓഫീസര്‍ ഉദയഭാനു അറിയിച്ചു.
