കോടഞ്ചേരി(കോഴിക്കോട്) : കോവിഡ് 19 രോഗബാധയേറ്റ് അമേരിക്കയിലെ ടെക്സാസിൽ കോഴിക്കോട് ജില്ലയിലെ കോടഞ്ചേരി വേളംകോട് ഞാളിയത്ത് റിട്ട. ലഫ് കമാൻഡർ സാബു എൻ. ജോണിന്റെ മകൻ പോൾ (21) മരിച്ചു.
ഹോസ്റ്റലിൽ നിന്നാണ് പോളിന് രോഗ ബാധയേറ്റത്. പിതാവ് നാവിക സേനയിൽ നിന്നു വിരമിച്ച ശേഷം ഐബിഎമ്മിൽ ജോലി ചെയ്യുന്നു. മാതാവ് കടുവത്തിങ്കൽ കുടുംബാഗം ജെസി. സഹോദരൻ ഡേവിഡ്.
മലയാളി വീട്ടമ്മ യുഎസിൽ മരിച്ചു
തൊടുപുഴ: കോവിഡ് ബാധിച്ച് അമേരിക്കയിൽ മലയാളി വീട്ടമ്മ മരിച്ചു. തൊടുപുഴ നെടിയശാല പുത്തൻവീട്ടിൽ മാത്യു കോശിയുടെ ഭാര്യ മറിയാമ്മ (80) ആണ് മരിച്ചത്.
കരിങ്കുന്നം കറുത്തേടത്ത് പുത്തൻപുരയിൽ പരേതനായ കുരുവിളയുടെ മകളാണ്. നഴ്സായ മറിയാമ്മ 40 വർഷത്തോളമായി അമേരിക്കയിലാണ്. കുടുംബസമേതം ന്യൂയോർക്ക് ന്യൂ ഹൈഡ് പാർക്കിൽ ആയിരുന്നു താമസം. കഴിഞ്ഞ ജനുവരിയിൽ നാട്ടിലെത്തി മടങ്ങിയിരുന്നു. ഇതിനിടെയാണ് കോവിഡ് 19 ബാധിച്ചത്.
കുറച്ചു ദിവസങ്ങളായി വെന്‍റിലേറ്ററിലായിരുന്നു. സംസ്കാരം പിന്നീട്. മക്കൾ: വിനി, വിജു, ജിജു. മരുമക്കൾ: ഫോമ, ഷിജി, സബ്ലിയ. മറിയാമ്മയുടെ 12 സഹോദരങ്ങളും അമേരിക്കയിൽ തന്നെയാണ്.
കോഴഞ്ചേരി സ്വദേശി യുഎസിൽ മരിച്ചു
പത്തനംതിട്ട: കോഴഞ്ചേരി തെക്കേമല സ്വദേശി ലാലു പ്രതാപ് ജോസ് (64) അമേരിക്കയിലെ ഫിലഡൽഫിയയിൽ കോവിഡ് ബാധിച്ചു മരിച്ചു.
ന്യൂയോർക്ക് മെട്രോ ട്രാഫിക് അഡ്മിനിസ്ട്രേഷനിൽ സബ് വേ ട്രാഫിക് കണ്ട്രോളറായിരുന്നു. തെക്കേമല തേരകത്തുമലയിൽ റിട്ടയേഡ് അധ്യാപിക പി.എസ്. മറിയാമ്മയുടെ മകനാണ്.
ഒരാഴ്ചയായി രോഗബാധിതനായി ഫിലഡൽഫിയയിൽ ചികിത്സയിലായിരുന്നു. ഭാര്യയും ചികിത്സയിലാണ്. കുടുംബസമേതം അമേരിക്കയിലായ ലാലു പ്രതാപ് ജോസ് കഴിഞ്ഞ ജനുവരിയിൽ നാട്ടിലെത്തിയിരുന്നു.
