കോട്ടയം: കോളജ് പഠന കാലത്ത് യൂണിവേഴ്സിറ്റി തലത്തിൽ 400 മീറ്റർ റിലേ മത്സരത്തിൽ പങ്കെടുത്തതിന്‍റെ ആത്മവിശ്വാസത്തിലാണ് ജില്ലാ കളക്്ടർ ഡോ.പി.കെ ജയശ്രീ നാലു കിലോഗ്രാം ഭാരമുള്ള ഷോട്ട്പുട്ട് ഉയർത്തി നോക്കിയത്.
കാണികളുടെ പ്രോത്സാഹനം കൂടിയായപ്പോൾ കളക്ടർ വീണ്ടും പഴയ അത്‌ലറ്റായി. ഷോർട്ട് പുട്ട് വീശിയെറിഞ്ഞു.
പാലാ മുനിസിപ്പൽ സ്റ്റേഡിയത്തിൽ നടന്ന റവന്യൂ വകുപ്പ് കായികമേള ഉദ്ഘാടനം ചെയ്യാനെത്തിയതായിരുന്നു കളക്ടർ.
സഹപ്രവർത്തകരുടെ പ്രോത്സാഹനത്തിനു മുന്നിൽ എഡിഎം ജിനു പുന്നൂസുമായി പഞ്ചഗുസ്തി സൗഹൃദ മത്സരത്തിലും പങ്കെടുത്താണ് കളക്ടർ മടങ്ങിയത്
അത്‌ലറ്റിക്സ് മത്സരങ്ങൾ കളക്ടർ ഫ്ലാഗ് ഓഫ് ചെയ്തു. 100 മീറ്റർ, 400 മീറ്റർ, 1500 മീറ്റർ ഓട്ട മത്സരവും, 4×100 മീറ്റർ റിലേ, പഞ്ചഗുസ്തി, ലോംഗ് ജംപ്, ഷോർട്ട്പുട്ട് എന്നീ ഇനങ്ങളിലായി 75 പേർ പങ്കെടുത്തു.
വിജയികൾ മേയ് അവസാനം തൃശൂരിൽ് നടക്കുന്ന സംസ്ഥാന റവന്യൂ വകുപ്പ് കായിക മേളയിൽ കോട്ടയത്തെ പ്രതിനിധീകരിച്ച് പങ്കെടുക്കും .
സബ് കലക്ടർ രാജീവ് കുമാർ ചൗധരി, ഡെപ്യൂട്ടി കളക്്ടർ (എൽഎ) കെ.എ മുഹമ്മദ് ഷാഫി , റവന്യൂ വകുപ്പ് ഉദ്യോഗസ്ഥർ എന്നിവർ ചടങ്ങിൽ പങ്കെടുത്തു.
