പാലക്കാട്: സ്വകാര്യ ബസ്സുകളിൽ യാത്ര ചെയ്യുന്ന വിദ്യാർഥികൾ യാത്രാക്കൂലിയിൽ ഇളവു ലഭിക്കുന്നതിന് സർക്കാർ നിശ്ചയിച്ച പ്രൊഫോമയിലുള്ള ബസ്സ് യാത്രാ കണ്‍സെഷൻ കാർഡുകൾ നിർബന്ധമായും കാണിക്കണമെന്ന് റീജിണൽ ട്രാൻസ്പോർട്ട് ഓഫീസർ അറിയിച്ചു. പല സ്വകാര്യ, സർക്കാർ കോളജുകളിലെ വിദ്യാർഥികളും കണ്‍സെഷൻ കാർഡുകൾ കാണിക്കാതെ ബസ്സ് ജീവനക്കാരുമായി വാക്ക്തർക്കങ്ങളിൽ ഏർപ്പെടുന്നതായി പരാതി ലഭിച്ചിട്ടുണ്ട്.
ഇക്കഴിഞ്ഞ മെയ് 28 ന് നടന്ന ജില്ലാ സ്റ്റുഡൻസ് ട്രാവൽ കമ്മിറ്റിയുടെ യോഗ തീരുമാനമനുസരിച്ച് വിദ്യാർഥികൾക്ക് അതത് സ്ഥാപനമേധാവികൾ യാത്രാ കണ്‍സെഷൻ കാർഡുകൾ ലഭ്യമാക്കണമെന്നും യാത്ര തുടങ്ങുന്നതും അവസാനിക്കുന്നതുമായ സ്ഥലംകൂടി വ്യക്തമായി കാർഡിൽ രേഖപ്പെടുത്തണമെന്നും ആർടിഒ അറിയിച്ചു.
