പേരാമ്പ്ര: മണ്ഡലം കോൺഗ്രസ് ഓഫീസിന് നേരെ അക്രമം. പേരാമ്പ്ര പ്രസിഡൻസി കോളജ് റോഡിൽ നിർമാണം പൂർത്തിയായ ഓഫീസ് കെട്ടിടത്തിന് നേരെയാണ് ഇന്നലെ അക്രമമുണ്ടായത്. ഓഫീസിന്‍റെ ഒന്നാം നിലയിലെ മുഴുവൻ ജനൽ ചില്ലുകളും ഗ്ലാസ് വാതിലും പൂർണമായി തകർത്തു. നിലത്ത് പതിച്ച ടൈലുകളും നശിപ്പിച്ചു.
പേരാമ്പ്ര പോലീസ് സ്ഥലത്തെത്തി അന്വേഷണം ആരംഭിച്ചു. സംഭവത്തിൽ പ്രതിഷേധിച്ച് ഇന്ന് വൈകീട്ട് ആറുവരെ പേരാമ്പ്രയിൽ ഹർത്താലിന് ബ്ലോക്ക് കോൺഗ്രസ് കമ്മിറ്റി ആഹ്വാനം ചെയ്തു. ഓഗസ്റ്റ് ഒന്നിന് നടക്കേണ്ടിയിരുന്ന ഓഫീസിന്‍റെ ഉദ്ഘാടനം ഉമ്മൻ ചാണ്ടിയുടെ അസൗകര്യത്തെ തുടർന്ന് മാറ്റിവയ്ക്കുകയായിരുന്നു.
ചാവക്കാട് കോൺഗ്രസ് പ്രവർത്തകൻ കൊല്ലപ്പെട്ടത്തിൽ പ്രതിഷേധിച്ച് കഴിഞ്ഞ ദിവസം പേരാമ്പ്രയിൽ യൂത്ത് കോൺഗ്രസ് നടത്തിയ പ്രകടനത്തിനിടയിൽ നിന്ന് എസ്ഡിപിഐ ഓഫീസിനുനേരെ കല്ലേറുണ്ടായിരുന്നു. ഇതേത്തുടർന്ന് കോൺഗ്രസിനെതിരെ എസ്ഡിപിഐ പ്രകടനവുമുണ്ടായി.
ഓഫീസ് അക്രമത്തിൽ പ്രതിഷേധിച്ച് പേരാമ്പ്രയിൽ കോൺഗ്രസ് പ്രവർത്തകർ പ്രകടനം നടത്തി. ബ്ലോക്ക് പ്രസിഡന്‍റ് രാജൻ മരുതേരി, ഡിസിസി ജനറൽ സെക്രട്ടറിമാരായ സത്യൻ കടിയങ്ങാട്, മുനീർ എരവത്ത്, യൂത്ത് കോൺഗ്രസ് പാർലമെന്‍റ് മണ്ഡലം പ്രസിഡന്‍റ് പി.കെ രാഗേഷ്, മണ്ഡലം കോൺഗ്രസ് പ്രസിഡന്‍റ് ബാബു തത്തക്കാടൻ, ഇ.പി മുഹമ്മദ്, പി.എം പ്രകാശൻ, പ്രദീഷ് നടുക്കണ്ടി, വി.ടി സൂരജ്, വി.വി ദിനേശൻ, ഷാജു പൊൻപറ, റഷീദ് പുറ്റംപൊയിൽ, ആർ.കെ. രജീഷ്കുമാർ, പി.കെ മജീദ്, പി.വി മൊയ്തി നേതൃത്വം നൽകി.രോപിച്ചു.
