വാഷിംഗ്ടൺ: കയ്യിലെടുക്കാവുന്ന യന്ത്രം ഉപയോഗിച്ച് അഞ്ചു മിനിറ്റ്‌ കൊണ്ട് കൊറോണ പോസിറ്റീവ് ആയ ആളുടെ പരിശോധന ഫലം അറിയാം. യുഎസിലുള്ള അബോട്ട് എന്ന ലാബാണ് കണ്ടുപിടുത്തത്തിന് പുറകില്‍.
പരീക്ഷണാടിസ്ഥാനത്തിലുള്ള ഉപയോഗത്തിന് ആരോഗ്യരംഗത്തുള്ളവര്‍ക്ക് ഉപകരണം ലഭ്യമാക്കാന്‍ യുഎസ് ഫുഡ് ആന്‍ഡ് ഡ്രഗ് അഡ്മിനിസ്‌ട്രേഷന്‍(എഫ്ഡിഎ) നിര്‍മ്മിച്ച അബോട്ട് കമ്പനിക്ക് അടിയന്തിര അനുമതി നല്‍കിയിട്ടുണ്ട്.
ദിവസം അന്പതിനായിരം യന്ത്രങ്ങൾ നിർമിക്കാൻ കഴിയുമെന്ന് കന്പനി അറിയിച്ചു. അടുത്തയാഴ്ച മുതൽ യന്ത്രം ലഭ്യമായി തുടങ്ങും.ഒരു ടോസ്റ്ററിന്‍റെ മാത്രം വലിപ്പമുള്ള ഉപകരണത്തിന്‍റെ പ്രവര്‍ത്തനം മോളിക്യുലാര്‍ ടെക്‌നോളജി ഉപയോഗിച്ചാണ്. കൊറോണ നെഗറ്റീവ് ഫലം അറിയാന്‍ 15 മിനുട്ടെടുക്കും.
ഒരു പ്രത്യേക കേന്ദ്രത്തിലേക്ക് അയച്ച് ഫലത്തിനു കാത്തിരിക്കാതെ കൊറോണ ഹോട്ട്‌സ്‌പോട്ട് ആയ സ്ഥലങ്ങളിലെല്ലാം ഈ ഉപകരണം എത്തിക്കാന്‍ കഴിഞ്ഞാല്‍ രോഗികളെ കണ്ടെത്തി എളുപ്പം ക്വാറന്‍റൈന്‍ ചെയ്യാന്‍ സാധിക്കും. മാത്രമല്ല ചികിത്സയും തുടങ്ങാം.
അടിയന്തിര ഉപയോഗത്തിനുള്ള അനുമതി മാത്രമേ നിലവില്‍ എഫ്ഡിഎ നല്‍കിയിട്ടുള്ളൂവെന്നും അബോട്ട് കമ്പനി അറിയിച്ചു.
