മംഗലംഡാം: കിഴക്കഞ്ചേരി തൃപ്പന്നൂർ എ.യു.പി സ്കൂളിലെ മൂന്നാം ക്ലാസ് വിദ്യാർഥിയായ അലൻ (ഒന്പത്) സഹോദരൻ യു.കെ.ജി വിദ്യാർഥിയായ അഥുൻ (അഞ്ച്) എന്നിവരാണ് സൈക്കിൾ വാങ്ങാൻ കുടുക്കകളിൽ ശേഖരിച്ച് വന്നിരുന്ന സന്പാദ്യം മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നൽകിയത്.
കഴിഞ്ഞ പ്രളയക്കെടുതിയിലും ഇവരുടെ സന്പാദ്യം ദുരിതാശ്വാസ നിധിയിലേക്ക് നൽകി മാതൃകയായതാണ്. മുടപ്പല്ലൂർ ഗവ.ഹൈസ്കൂളിലെ ജീവനക്കാരനായ കിഴക്കഞ്ചേരി തെക്കിൻകല്ല വെട്ടിക്കൽ കുളന്പ് സുഭാഷിന്‍റ മക്കളാണ് അലനും അഥുനും.
തങ്ങളുടെ സന്പാദ്യവുമായി അച്ഛനൊപ്പം മംഗലംഡാം പോലീസ് സ്റ്റേഷനിലെത്തിയ കുട്ടികളിൽ നിന്നും എസ്.ഐ നീൽ ഹെക്ടർ ഫെർണാണ്ടസും അഡീഷണൽ എസ്ഐ കെ.എസ് സുന്ദരനും കുടുക്കകൾ ഏറ്റ് വാങ്ങി കുട്ടികളെ അഭിനന്ദിച്ചു.
