തൊടുപുഴ: ഇടുക്കി ജില്ലയില്‍ മൂന്നു പേര്‍ക്ക് കൂടി രോഗം സ്ഥിരീകരിച്ചതായി ജില്ലാ കളക്ടര്‍ എച്ച്. ദിനേശന്‍ അറിയിച്ചു. തൊടുപുഴ നഗരസഭ വനിത കൗണ്‍സിലര്‍, തൊടുപുഴ ജില്ലാ ആശുപത്രിയിലെ സ്റ്റാഫ് നഴ്‌സ്, ബംഗളുരുവില്‍ നിന്ന് വന്ന ഇടുക്കി – നാരകക്കാനം സ്വദേശി എന്നിവര്‍ക്ക് ആണ് രോഗം സ്ഥിരീകരിച്ചത്.
ഇന്നലെ രാത്രിയാണ് ഇവരുടെ ഫലം ലഭിച്ചത്. മൂന്നു പേരെയും ഇന്നലെ തന്നെ ആശുപത്രിയില്‍ പ്രവേശിപ്പിച്ചു.ജില്ലയിലെ സ്ഥിതി ആശങ്കാജനകമാണെന്ന് ഇന്നു രാവിലെ ചേര്‍ന്ന അവലോകന യോഗത്തിനു ശേഷം മന്ത്രി എം.എം.മണി പറഞ്ഞു.
ഈ സാഹചര്യത്തില്‍ ജില്ലയില്‍ കൂടുതല്‍ നിയന്ത്രണങ്ങള്‍ ഏര്‍പ്പെടുത്തേണ്ടി വരുമെന്നും മന്ത്രി പറഞ്ഞു. കളക്ടര്‍ എച്ച്.ദിനേശന്‍റെ അധ്യക്ഷതയില്‍ ചേര്‍ന്ന യോഗത്തില്‍ ഡീന്‍ കുര്യാക്കോസ് എംപി, എംഎല്‍എമാരായ പി.ജെ.ജോസഫ്, റോഷി അഗസ്റ്റിന്‍, എസ്.രാജേന്ദ്രന്‍, ജില്ലാ മെഡിക്കല്‍ ഓഫീസര്‍ ഡോ. എന്‍.പ്രിയ എന്നിവര്‍ പങ്കെടുത്തു.
