കടയ്ക്കല്‍ : കടയ്ക്കലില്‍ ആരോഗ്യപ്രവര്‍ത്തകയ്ക്ക് കോവിഡ് സ്ഥിരീകരിച്ചു. താലൂക്ക് ആശുപത്രിയിലെ ലേബര്‍ റൂം ജീവനക്കാരിക്കാണ് കഴിഞ്ഞദിവസം കോവിഡ് പോസിറ്റീവ് ആയത്.
ഇതോടെ ആശുപത്രിയിലെ ലേബര്‍ വിഭാഗം പൂര്‍ണമായും അടച്ചു. ഇവിടെ ചികിത്സയില്‍ ഉണ്ടായിരുന്നവരെ കൊല്ലം വിക്ടോറിയ, പുനലൂര്‍, കൊട്ടാരക്കര താലൂക്ക് ആശുപത്രികള്‍ എന്നിവിടങ്ങളിലേക്ക് മാറ്റി.
ആശുപത്രിയില്‍ നേഴ്സുമായി കൂടുതല്‍ സമ്പര്‍ക്കത്തില്‍ ഏര്‍പ്പെട്ട ജീവനക്കാര്‍ അടക്കമുള്ളവരെ നിരീക്ഷണത്തില്‍ കഴിയാന്‍ ജില്ല ാമെഡിക്കല്‍ കേന്ദ്രത്തില്‍ നിന്നും നിര്‍ദേശം നല്‍കിയിട്ടുണ്ട്.
അത്യാവശ്യ ചികിത്സക്കായി മാത്രമേ രോഗികൾ ആശുപത്രിയിലേക്ക് എത്താന്‍ പാടുള്ളൂവെന്ന് സൂപ്രണ്ട് അറിയിച്ചു. കടുത്ത നിയന്ത്രണങ്ങള്‍ തുടരുന്ന അഞ്ചല്‍, അലയമണ്‍, ഏരൂര്‍, ഇടമുളയ്ക്കല്‍ പഞ്ചായത്തുകളില്‍ കനത്ത ജാഗ്രത അധികൃതര്‍ തുടരുകയാണ്.
ഏരൂര്‍ കുളത്തുപ്പുഴ പഞ്ചായത്ത് അതിര്‍ത്തിയായ പതിനൊന്നാം മൈല്‍ വാര്‍ഡില്‍ തച്ചന്‍കോണം സ്വദേശിയായ യുവാവിനു കഴിഞ്ഞ ദിവസം കോവിഡ് സ്ഥിരീകരിച്ചതോടെ കുളത്തുപ്പുഴ പഞ്ചായത്തും ആശങ്കയിലാണ്.
ഒന്നരമാസത്തെ ഇടവേളക്ക് ശേഷം കുളത്തുപ്പുഴയില്‍ വീണ്ടും കോവിഡ് സ്ഥിരീകരിച്ചതോടെ പഞ്ചായത്ത് തല ജാഗ്രത സമിതി അടിയന്തര യോഗം ചേര്‍ന്നു.
