പകല്‍ നാട്ടില്‍ കറങ്ങി പശുക്കളെ കണ്ടുവെയ്ക്കുകയും രാത്രിയില്‍ സ്ഥലത്തെത്തി പശുക്കളെ മോഷ്ടിച്ച് കടത്തി വില്‍ക്കുന്ന സംഘത്തിലെ മൂന്നു പേര്‍ പിടിയില്‍.
സംഭവത്തില്‍ മലപ്പുറം സ്വദേശികളായ മുഹമ്മദ് ഹഫീഫ് (28), ഭാര്യ അന്‍സീന(25), അന്‍സീനയുടെ സഹോദരന്‍ അനസ് (27) എന്നിവരെ പാലക്കാട് ടൗണ്‍ നോര്‍ത്ത് പോലീസ് അറസ്റ്റ് ചെയ്തു.
ശേഖരീപുരം ഭാഗത്ത് പശുവിനെ മോഷ്ടിക്കാന്‍ ശ്രമിക്കുന്നതിനിടെയായിരുന്നു പ്രതികള്‍ പിടിയിലായത്.
പകല്‍ സമയങ്ങളില്‍ പശുക്കളുള്ള വീട് കണ്ടുവെക്കാനായി മുഹമ്മദ് ഹാഫിഫും അന്‍സീനയുമാണ് സ്‌കൂട്ടറില്‍ പട്ടണത്തിലും പരിസരപ്രദേശങ്ങളിലും കറങ്ങി നടക്കുക.
തുടര്‍ന്ന് രാത്രി മറ്റ് രണ്ട് പേര്‍ക്കൊപ്പം എത്തി പശുക്കളെ അഴിച്ചുകൊണ്ട് പോകുകയുമാണ് പതിവ്.
സീറ്റ് എടുത്തുമാറ്റിയ ട്രാവലറില്‍ കയറ്റിയ പശുക്കളെ മഞ്ചേരി ചന്തയില്‍ കൊണ്ടുപോയി വില്‍ക്കുകയാണ് പതിവെന്നും പോലീസ് പറയുന്നു.
പശുക്കളെ കടത്തിക്കൊണ്ടുപോകാനായി വാഹനത്തില്‍ സീറ്റ് അഴിച്ചുമാറ്റി പ്രത്യേകം രൂപകല്പന ചെയ്തിട്ടുണ്ടെന്നും പോലീസ് കണ്ടെത്തി.
പശുക്കളെ കാണാനില്ലെന്ന് നിരന്തരം പരാതികള്‍ ലഭിച്ചതോടെയാണ് ടൗണ്‍ നോര്‍ത്ത് ഇന്‍സ്പെക്ടറുടെ നേതൃത്വത്തില്‍ അന്വേഷണം ആരംഭിച്ചത്.
