കുളത്തുപ്പുഴ:കേന്ദ്രസര്‍ക്കാരിനെതിരെ സിപിഐ യുടെ നേതൃത്വത്തില്‍ “മോദിയെ പുറത്താക്കു, ഇന്ത്യയെ രക്ഷിക്കു” എന്ന മുദ്രാവക്യം ഉയര്‍ത്തി സംഘടിപ്പിക്കുന്ന കാല്‍നട ജാഥക്ക് തുടക്കമായി. അഞ്ചല്‍ മണ്ഡലം കമ്മിറ്റിയുടെ നേതൃത്വത്തില്‍ നടക്കുന്ന ജാഥ കുളത്തുപ്പുഴയില്‍ നിന്നുമാണ് ആരംഭിച്ചത്.
സിപിഐ സംസ്ഥാന എക്സികുട്ടീവ് അംഗxപി.എസ് സുപാല്‍ ക്യാപ്റ്റന്‍ കെ.സി ജോസിന് പതാക കൈമാറി ജാഥ ഉദ്ഘാടനം ചെയ്തു. കള്ളപ്പണം പിടിക്കാന്‍ എന്ന പേരില്‍ നോട്ടുനിരോധനം നടത്തി ജനങ്ങളെ മരണത്തിലേക്ക് തള്ളിവിട്ട കേന്ദ്രസര്‍ക്കാര്‍ ഇപ്പോള്‍ ഇന്ധന വില വര്‍ധനവിലൂടെ ജനങ്ങളെ വീണ്ടും ആത്മഹത്യയിലേക്ക് തള്ളിവിടുകയാണ് എന്ന് പി.എസ് സുപാല്‍ ഉദ്ഘാടന പ്രസംഗത്തില്‍ പറഞ്ഞു.
മണ്ഡലം സെക്രട്ടറിയേറ്റംഗം കെ അനില്‍കുമാര്‍ അദ്ധ്യക്ഷത വഹിച്ച ചടങ്ങില്‍ ലോക്കല്‍കമ്മിറ്റി സെക്രട്ടറി പി അനില്‍കുമാര്‍ സ്വാഗതം പറഞ്ഞു.സിപിഐ സംസ്ഥാന കമ്മിറ്റി അംഗം വി.പി ഉണ്ണികൃഷ്ണന്‍, മണ്ഡലം സെക്രട്ടറി ലിജു ജമാല്‍,എസ് സലിം, സന്തോഷ്‌ കുമാര്‍, കെ.എന്‍ വാസവന്‍, പി ജെ രാജു, ഷീജ കെ ആര്‍ എന്നിവര്‍ പ്രസംഗിച്ചു.
