ഇടുക്കി: സി.വി.വർഗീസിനെ സിപിഎം ഇടുക്കി ജില്ലാ സെക്രട്ടറിയായി തെരഞ്ഞെടുത്തു. അനാരോഗ്യം മൂലം കെ.കെ.ജയചന്ദ്രൻ ഒഴിവായ സാഹചര്യത്തിലാണ് ജില്ലയിൽ പുതിയ ജില്ലാ സെക്രട്ടറിയെ പാർട്ടി നിയോഗിച്ചത്.
നിയമസഭാ തെരഞ്ഞെടുപ്പിൽ സീറ്റ് ലഭിക്കാതിരുന്നതിനെ തുടർന്ന് ഇടഞ്ഞുനിന്ന ദേവികുളം മുൻ എംഎൽഎ എസ്.രാജേന്ദ്രൻ അടക്കം എട്ട് പേരെ ജില്ലാ കമ്മിറ്റിയിൽ നിന്നും ഒഴിവാക്കിയിട്ടുണ്ട്.
39 അംഗ ജില്ലാ കമ്മിറ്റിയിൽ 10 പേർ പുതുമുഖങ്ങളാണ്. മുതിർന്ന നേതാവും മുൻ മന്ത്രിയുമായ എം.എം.മണിയുടെ മകൾ സുമ സുരേന്ദ്രനും ജില്ലാ കമ്മിറ്റിയിൽ സ്ഥാനം പിടിച്ചിട്ടുണ്ട്.
2001 മുതൽ ജില്ലാ സെക്രട്ടറിയേറ്റ് അംഗമായ വർഗീസ് രണ്ടു തവണ നിയമസഭാ തെരഞ്ഞെടുപ്പിൽ മത്സരിച്ചെങ്കിലും പരാജയപ്പെട്ടിരുന്നു. ഡിവൈഎഫ്ഐ സംസ്ഥാന വൈസ് പ്രസിഡന്‍റ്, കെഎസ്ആർടിസി ഡയറക്ടർ ബോർഡ് അംഗം എന്നീ നിലകളിൽ പ്രവർത്തിച്ചിട്ടുണ്ട്. ജില്ലാ പഞ്ചായത്ത് അംഗം വി.എൻ.മോഹനനെ പിന്തള്ളിയാണ് വർഗീസ് ജില്ലാ സെക്രട്ടറി സ്ഥാനത്തെത്തിയത്.
