മട്ടന്നൂർ: പറയാനുള്ളതെല്ലാം പാർട്ടി കോൺഗ്രസിന്‍റെ സെമിനാറിൽ പറയാമെന്ന് കോൺഗ്രസ് നേതാവ് കെ.വി. തോമസ്.
സിപിഎം പാർട്ടി കോൺഗ്രസ് സെമിനാറിൽ പങ്കെടുക്കുന്നതിനായി എത്തിയ അദ്ദേഹം കണ്ണൂർ വിമാനത്താവളത്തിൽ മാധ്യമപ്രവർത്തകരോട് സംസാരിക്കുകയായിരുന്നു.
സിപിഎം ജില്ലാ സെക്രട്ടറി എം.വി.ജയരാജന്‍റെ നേതൃത്വത്തിൽ ചുവപ്പു ഷാളണിയിച്ചാണ് അദ്ദേഹത്തെ സ്വീകരിച്ചത്.
ഇതേക്കുറിച്ചുള്ള ചോദ്യത്തിന് ചുവപ്പായാലും പച്ചയായാലും ത്രിവർണമായാലും ഷാളാണല്ലോയെന്നായിരുന്നു കെ.വി. തോമസിന്‍റെ പ്രതികരണം.
കേന്ദ്ര സംസ്ഥാന ബന്ധങ്ങള്‍ എന്ന വിഷയത്തില്‍ നടക്കുന്ന സെമിനാറില്‍ തമിഴ്‌നാട് മുഖ്യമന്ത്രി എം.കെ.സ്റ്റാലിനാണ് മുഖ്യാതിഥിയെങ്കിലും കെ.വി.തോമസിന്‍റെ വാക്കുകള്‍ക്കാണ് രാഷ്‌ട്രീയ കേരളം കാതോര്‍ക്കുന്നത്.
കെ.വി.തോമസിന്‍റെ പ്രതികരണം അടിസ്ഥാനമാക്കിയാവും കോണ്‍ഗ്രസും അച്ചടക്ക നടപടിയിലടക്കം തീരുമാനം എടുക്കുക.
കേന്ദ്ര സംസ്ഥാന ബന്ധങ്ങള്‍ എന്ന വിഷയത്തിലെ സെമിനാറില്‍ കെ.വി.തോമസ് പങ്കെടുക്കുമ്പോള്‍ രാഷ്‌ട്രീയ മാനങ്ങള്‍ ഏറെയാണ്.
