മാന്നാർ: മദ്യപിച്ചെത്തി ഭാര്യയെ ക്രൂരമായി മർദിച്ച് വധിക്കാന്‍ ശ്രമിച്ച ഭര്‍ത്താവിനെ പോലീസ് പിടികൂടി. കൊല്ലം കുളത്തൂര്‍ കരിക്കകം സന്തോഷ് ഭവനത്തില്‍ ഷൈനുവിനെ (രതീഷ്-39) യാണ് മാന്നാര്‍ പോലീസ് അറസ്റ്റു ചെയ്തത്.
ഇയാളുടെ ഭാര്യയായ തൃപ്പെരുന്തുറ കൊറ്റോട്ടുകാവില് രാജിയെ ക്രൂരമായി മർദിച്ചതിനും കൊലപ്പെടുത്താൻ ശ്രമിച്ചതിനുമാണ് ഇയാള്‍ക്കെതിരേ കേസെടുത്തത്. മാവേലിക്കര എഫ്സിഐ ഗോഡൗണിലെ തൊഴിലാളിയായ ഇയാള്‍ കാറില്‍ മദ്യവുമായി വീട്ടിലെത്തിയത് രാജി ചോദ്യം ചെയ്തു.
ഇതില്‍ പ്രകോപിതനായി ഇയാള്‍ രാജിയെ ക്രൂരമായി മര്‍ദിച്ചു. ബഹളം കേട്ട് പരിസരവാസികളും ബന്ധുമിത്രാദികളും എത്തിയപ്പോള് വെട്ടുകത്തിയുമായി ഇവര്‍ക്ക് നേരെ അടുത്തു.
കൂടാതെ വെട്ടുകത്തി രാജിയുടെ കഴുത്തില്‍വെച്ച് കൊല്ലുമെന്ന് ഭീഷണിപ്പെടുത്തി. സംഭവം അറിഞ്ഞത്തിയ പൊലീസ് സംഘം ഇയാളെ കീഴ്പ്പെടുത്തി വെട്ടുകത്തിയും ഹുക്കും വീട്ടില്‍ നിന്നും കണ്ടെടുത്തു.
സ്ഥിരം മദ്യപാനിയായ ഇയാള്‍ക്കെതിരെ മുമ്പും പരാതി ലഭിച്ചിട്ടുണ്ടെന്നും പൊലീസ് പറഞ്ഞു. മാന്നാര്‍ എസ് എച്ച് ഒ ജോസ് മാത്യു, എസ് ഐ സി.എസ് അഭിരാം, എ എസ് ഐ മാരായ ജി മധുസൂദനന്‍, മോഹന്ദാസ്, ശ്രീകുമാര്‍, ഷിനു എന്നിവരടങ്ങുന്ന സംഘമാണ് പ്രതിയെ പിടികൂടിയത്. കോടതിയിൽ ഹാജരാക്കിയ ഇയാളെ റിമാൻഡ് ചെയ്തു.
