അന്തരിച്ച തമിഴ്‌നാട് മുഖ്യമന്ത്രി ജയലളിതയുടെ മകളാണെന്നു പറഞ്ഞ് പ്രചരിപ്പിക്കപ്പെടുന്ന ചിത്രം ഒരു മലയാളി യുവതിയുടേതെന്ന് കണ്ടെത്തല്‍. തിരുവനന്തപുരം സ്വദേശിനിയായ ഈ യുവതിമൃദംഗ വിദ്വാന്‍ വി. ബാലാജിയുടെ ബന്ധുവുമാണെന്ന്് മാധ്യമപ്രവര്‍ത്തകയും അവതാരികയുമായ ചിന്മയി ശ്രിപ്രദ തന്റെ ഫേസ്ബുക്കില്‍ കുറിച്ചതോടെയാണ് സംഭവത്തിന് സ്ഥിരീകരണമായത്. ബാലാജിയും ഇക്കാര്യം സ്ഥിരീകരിച്ച് ഫേസ്ബുക്കില്‍ പോസ്റ്റിട്ടിട്ടുണ്ട്. ദിവ്യ തന്റെ ഭാര്യാസഹോദരിയാണെന്നാണ് ബാലാജി കുറിച്ചിരിക്കുന്നത്. ഇവര്‍ നിലവില്‍ ഓസ്‌ട്രേലിയയില്‍ ഭര്‍ത്താവിനൊപ്പം സ്ഥിരതാമസമാണെന്നും ബാലാജി പറയുന്നു.
തെലുങ്ക് താരം ശോഭന്‍ ബാബുവുമായി പ്രണയത്തിലായിരുന്ന കാലത്ത് ജലയളിതയ്ക്ക് ഒരു മകളുണ്ടായെന്നും ആ പെണ്‍കുട്ടിയുടെ പേര് ശോഭന എന്നായിരുന്നെന്നുമുള്ള പ്രചാരണം പഴക്കമേറിയതാണ്. 2014 മുതലാണ് ജയലളിതയുടെ മകളെന്ന് പേരില്‍ ഒരു യുവതിയുടെ ചിത്രം പ്രചരിച്ചത്. ഈ യുവതി ഇപ്പോള്‍ അമേരിക്കയിലാണെന്നായിരുന്നു അന്നത്തെ പ്രചാരണങ്ങള്‍. ഊട്ടിയിലുള്ള തന്റെ മകളെ കാണാന്‍ ഇടയ്ക്കിടെ വരാറുണ്ടായിരുന്ന ജയലളിതയെക്കുറിച്ചും ഒരു കാലത്ത് കഥകള്‍ പ്രചരിച്ചിരുന്നു. എന്തായാലും ജയയുടെ മകളേക്കുറിച്ച് തമിഴ്‌നാട്ടുകാര്‍ അറിഞ്ഞിട്ടില്ലെന്നു തോന്നുന്നു.
