തിരുവനന്തപുരം: ലോക്സഭാ തെരഞ്ഞെടുപ്പു പ്രവർത്തനങ്ങൾക്ക് ഒരുങ്ങാൻ യൂത്ത് കോണ്ഗ്രസ്, കെഎസ്‌യു, മഹിളാ കോണ്ഗ്രസ് സംസ്ഥാന ഘടകങ്ങൾക്ക് കേരളത്തിന്‍റെ ചുമതലയുള്ള എഐസിസി ജനറൽ സെക്രട്ടറി ദീപാദാസ് മുൻഷിയുടെ നിർദേശം.
ഇന്നലെ കേരളത്തിലെത്തിയ ദീപാദാസ് മുൻഷി യൂത്ത് കോണ്ഗ്രസ്, മഹിളാ കോണ്ഗ്രസ്, കെഎസ്‌യു നേതാക്കളുമായി ഇന്നലെ പ്രത്യേകം പ്രത്യേകം നടത്തിയ കൂടിക്കാഴ്ചയിലാണു നിർദേശം നൽകിയത്.
ലോക്സഭാ തെരഞ്ഞെടുപ്പിൽ പാർലമെന്‍റ് നിയോജക മണ്ഡലം തലങ്ങളിലും ബ്ലോക്ക് മണ്ഡലം, ബൂത്തു തലങ്ങളിലും പ്രത്യേക വനിത സ്ക്വാഡുകളെ ഇറക്കി പ്രവർത്തനം ശക്തിപ്പെടുത്തുമെന്നു മഹിളാ കോണ്ഗ്രസ് സംസ്ഥാന അധ്യക്ഷ ജെബി മേത്തർ അറിയിച്ചു.
പാർലമെന്‍റ് തെരഞ്ഞെടുപ്പ് പ്രവർത്തനത്തിന്‍റെ ഭാഗമായി മഹിള കോണ്ഗ്രസ് സംസ്ഥാന വ്യാപകമായി സംഘടിപ്പിക്കുന്ന ഞങ്ങൾ തയാർ പരിപാടിയുടെ സംസ്ഥാന തല ഉദ്ഘാടനം കെപിസിസി ഓഫീസിൽ ദീപദാസ് മുൻഷി നിർവഹിച്ചു. പാർലമെന്‍റ് തെരഞ്ഞെടുപ്പിൽ മഹിളാ കോണ്ഗ്രസിന് വലിയ പങ്കാണെന്ന് ദീപ ദാസ് മുൻഷി പറഞ്ഞു.
ഇന്ന് ലോക്സഭാ തെരഞ്ഞെടുപ്പു പ്രകടനപത്രികയിലേക്ക് പൊതുജനാഭിപ്രായം തേടി കോണ്ഗ്രസ് മാനിഫെസ്റ്റോ കമ്മിറ്റിയുടെ യോഗത്തിൽ ദീപാ ദാസ് മുൻഷി പങ്കെടുക്കും. ഉച്ചകഴിഞ്ഞു മൂന്നിനു പാളയം അയ്യൻകാളി ഹാളിൽ നടക്കുന്ന പരിപാടിയിൽ കോണ്ഗ്രസ് പ്രവർത്തകസമിതി അംഗം ശശി തരൂരും പങ്കെടുക്കും.
