ശാസ്താംകോട്ട: ജീവിതത്ത യാഥാർഥ്യബോധത്തോടെ നോക്കി കാണണമെന്ന് നടൻ ദേവൻ അഭിപ്രായപ്പെട്ടു. ദക്ഷിണ ഭാരതത്തിലെ ഏക ദുര്യോധന ക്ഷേത്രമായ പോരുവഴി പെരുവിരുത്തി മലനടയിൽ മലക്കുട മഹോത്സവത്തിന്‍റെ ഭാഗമായി നടന്ന മലക്കുട മഹാസമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം.
മതങ്ങൾ മനുഷ്യനെ വേർതിരിക്കുന്ന മതിൽക്കെട്ടല്ല.പക്ഷേ മനുഷ്യർ മതത്തെ തങ്ങളുടെ സ്വാർഥ താല്പര്യങ്ങൾക്കുവേണ്ടി ഉപയോഗിക്കുകയാണ്. മനുഷ്യൻ മനുഷ്യനെ പച്ചയ്ക്ക് പിച്ചിച്ചീന്തുന്ന കാലഘട്ടത്തിലൂടെയാണ് നാം കടന്നു പൊയ്ക്കൊണ്ടിരിക്കുന്നത്.
രാഷ്ട്രീയത്തിന്‍റെ പേരിലായാലും മതത്തിന്‍റെയും ജാതിയുടെയും പേരിലായാലും ഇതിന് അറുതിയുണ്ടാകണമെന്നും ദേവൻ കൂട്ടിച്ചേർത്തു.ചടങ്ങിൽ മലനട ദേവസ്വം പ്രസിഡന്‍റ് ആർ.മാധവൻ അധ്യക്ഷത വഹിച്ചു.ഗാനരചയിതാവ് കിളിമാനൂർ രാമവർമ മുഖ്യപ്രഭാഷണം നടത്തി.കോവൂർ കുഞ്ഞുമോൻ എംഎൽഎ പ്രതിഭകളെ ആദരിച്ചു.
ജില്ലാ പഞ്ചായത്ത് വൈസ് പ്രസിഡന്‍റ് എം.ശിവശങ്കരപിള്ള, ബ്ലോക്ക് പഞ്ചായത്ത് പ്രസിഡന്‍റ് എ.സുമ, ബ്ലോക്ക് വൈസ് പ്രസിഡന്‍റ് എസ്.ശിവൻ പിള്ള, ഗ്രാമപഞ്ചായത്ത് പ്രസിഡന്‍റ് എസ്.ഷീജ, ഗ്രാമപഞ്ചായത്തംഗങ്ങളായ ബി.ബിനീഷ്, ആർ.രാധ, ദേവസ്വം വൈസ് പ്രസിഡന്‍റ് എസ്.സുരാജ്, മലനട ദേവസ്വം പ്രസിഡന്‍റ് അഖിൽ സിദ്ധാർഥൻ, ഖജാൻജി എൻ.മുരളീധരൻ പിള്ള എന്നിവർ പ്രസംഗിച്ചു.
