ചേർത്തല: ഡിജിപി ആർ. ശ്രീലേഖയുടെ കാറിൽ ഇടിച്ചശേഷം നിർത്താതെ പോയ പെട്ടി ഓട്ടോറിക്ഷാ ഡ്രൈവറെ പോലീസ് വീട്ടിൽ നിന്ന് പിടികൂടി. ആലപ്പുഴ സീവ്യൂ വാർഡിൽ പാണാവള്ളി പുരയിടം വീട്ടിൽ എ. അക്ബറിന്‍റെ (42) ഓട്ടോറിക്ഷയാണ് ബുധനാഴ്ച രാത്രി ദേശീയപാതയിൽ ചേർത്തല എക്സ്റേ കവലയ്ക്ക് സമീപം അപകടത്തിൽപ്പെട്ടത്. ഡിജിപിക്കു നിസാരപരിക്കേറ്റു.
അപകടശേഷം കടന്നുകളഞ്ഞ അക്ബറിനെ സിസിടിവി ദൃശ്യങ്ങളുടെ സഹായത്തോടെ വീട്ടിൽ നിന്ന് പിടികൂടുകയായിരുന്നു. കുറ്റം സമ്മതിച്ച ഇയാൾ വാഹനവുമായി ചേർത്തല സ്റ്റേഷനിലെത്തി. പ്രതിയെ പിന്നീടു ജാമ്യത്തിൽ വിട്ടു.
