പൂന: വിരാട് കോഹ്ലിയുടെ ഇന്ത്യന്‍ ടീമിന് എക്കാലത്തെയും മികച്ച ടീമായി മാറാനുള്ള കഴിവുണ്ടെന്ന് ഇന്ത്യന്‍ ടീം മുന്‍ നായകന്‍ മഹേന്ദ്രസിംഗ് ധോണി. പൂനയില്‍ മാധ്യമങ്ങളുമായി നടത്തിയ കൂടിക്കാഴ്ചയിലാണ് ധോണി കോഹ്ലിയുടെ ടീമിനെ പുകഴ്ത്തിയത്.എണ്ണത്തിന്റെ അടിസ്ഥാനത്തിലാണെങ്കില്‍ കോഹ്ലിയുടെ ടീമിന് എല്ലാ ഫോര്‍മാറ്റിലുമായി എന്റെ ടീമിനേക്കാള്‍ വിജയം നേടാന്‍ കഴിയും. ഇതാണ് ഏറ്റവും മികച്ച ഇന്ത്യന്‍ ടീമെന്നു ഞാന്‍ കരുതുന്നു– ധോണി പറഞ്ഞു.
ഇന്ത്യന്‍ ടീമിന്റെ ദക്ഷിണാഫ്രിക്കന്‍ പര്യടനത്തിനിടെയാണ് താന്‍ നായകസ്ഥാനം ഒഴിയാന്‍ തീരുമാനിച്ചതെന്നും ഇന്ത്യന്‍ സാഹചര്യത്തില്‍ വ്യത്യസ്ത ഫോര്‍മാറ്റുകളില്‍ വ്യത്യസ്ത നായകര്‍ എന്നത് ബുദ്ധിമുട്ടാണെന്നും ധോണി വ്യക്തമാക്കി.
ജീവിതത്തില്‍ ഒന്നിനെകുറിച്ചും തനിക്കു നഷ്ടബോധം തോന്നിയിട്ടില്ലെന്നും ഇതുകൊണ്ടുതന്നെ നല്ല കാലത്തിലുടെയും മോശം കാലത്തിലുടെയും കടന്നുപോകാന്‍ തനിക്കു ബുദ്ധിമുട്ടുണ്ടായില്ലെന്നും ധോണി പറഞ്ഞു.
