ഈ സോഷ്യല്‍ മീഡിയ കാലത്ത് നിരവധി പുതിയ പുതിയ ഭക്ഷണങ്ങളാണ് കളത്തിലിറങ്ങുന്നത്. കേട്ടാല്‍ അയ്യേ… എന്നു വയ്ക്കുന്ന തരത്തിലുള്ളവയും ഇക്കൂട്ടത്തിലുണ്ട്.
അലുവയും മത്തിക്കറിയും എന്നു പറഞ്ഞതുപോലെയുള്ളവയാണ് പലതും. ചോക്ലേറ്റ് ചിക്കന്‍ ബിരിയാണിയും ഐസ്‌ക്രീം ദോശയുമൊക്കെ കഴിഞ്ഞ് അടുത്ത ഐറ്റം എത്തിയിരിക്കുകയാണ്.
ദില്‍ക്കുഷ് ദോശയെന്നാണ് പുതിയ ഐറ്റത്തിന്റെ പേര്. പേരുപോലെ തന്നെ അല്‍പം വെറൈറ്റിയാണ് ഈ ദില്‍കുഷ് ദോശ. പനീറും ചീസും കാബേജുമൊക്കെ ചേര്‍ത്താണ് ഈ ദോശ തയ്യാറാക്കുന്നത്.
അതിലെന്താണിത്ര കൗതുകം എന്നു ചിന്തിച്ചാല്‍ തെറ്റി. തീര്‍ന്നില്ല തേങ്ങാ ചട്‌നിയും അണ്ടിപ്പരിപ്പും കാപ്‌സിക്കവുമൊക്കെ ഈ ദോശയിലെ ചേരുവകളാണെന്ന് കേള്‍ക്കുമ്പോഴാണ് അത്ഭുതം ഇരട്ടിക്കുക.
ദീപക് പ്രഭു എന്നയാളാണ് ഈ വെറൈറ്റി ദോശയുടെ വീഡിയോ പങ്കുവച്ചത്. ദോശമാവ് പരത്തിയതിനുശേഷം ബട്ടര്‍ പുരട്ടുന്നു. ഇതിലേക്ക് സവോളയും പച്ചമുളകും കാബേജും തേങ്ങാ ചട്‌നിയും ചേര്‍ക്കുന്നു.
ഇനി ഇതിലേക്ക് പനീര്‍ ചേര്‍ക്കുന്നു. തുടര്‍ന്ന് അണ്ടിപ്പരിപ്പും ഉണക്ക മുന്തിരിയും ജീരകപ്പൊടിയും ഗരംമസാലയും ചേര്‍ത്ത് നന്നായി ഇളക്കി മൂടിവെക്കുന്നു.
കൂട്ട് നന്നായി പിടിച്ചതിനുശേഷം വീണ്ടും ചീസ് ചേര്‍ത്ത് മല്ലിയിലകൊണ്ട് അലങ്കരിച്ച് മടക്കിയെടുത്ത് നാലു കഷ്ണങ്ങളാക്കി വിളമ്പുന്നു.
ദോശയില്‍ അണ്ടിപ്പരിപ്പും മുന്തിരിയും കണ്ട് അത്ഭുതപ്പെട്ടവരാണ് ഏറെയും. ദോശയ്‌ക്കൊപ്പം ചട്‌നിയോ സാമ്പാറോ അല്ലാതെ മറ്റൊന്നും സങ്കല്‍പിക്കാന്‍ പോലും കഴിയാത്ത സാഹചര്യത്തില്‍ ഇത്തരമൊരു വീഡിയോ ഹൃദയം തകര്‍ക്കുന്നു എന്നാണ് ഒരാള്‍ രസകരമായി കമന്റ് ചെയ്തത്.
ഇത് ദോശയാണോ അതോ പിസയാണോ എന്നും ദോശയെ കൊല്ലാക്കൊല ചെയ്തു എന്നും എന്തിന് ദോശയോട് ഈ ക്രൂരത എന്നുമൊക്കെ പറയുന്നവരുണ്ട്.
എന്നാല്‍ ഈ ദോശയെ പിന്തുണച്ചും ആളുകള്‍ എത്തുന്നുണ്ട് ഇഷ്ടമുള്ളവര്‍ ദോശ കഴിച്ചോട്ടെ എന്നും വ്യത്യസ്ഥത പരീക്ഷിക്കുന്നത് ഓരോത്തരുടേയും സ്വാതന്ത്ര്യമാണെന്നും ദോശയെ പിന്തുണയ്ക്കുന്ന ആളുകള്‍ പറയുന്നു.
