പാലാ: മൂന്നാമത് കോട്ടയം ജില്ലാ കിഡ്‌സ് അത്‌ലറ്റിക്‌സ് മീറ്റ് പാലാ അല്‍ഫോന്‍സാ കോളജില്‍ നടന്നു. അഞ്ച് മുതല്‍ 12 വയസ് വരെയുള്ള കുട്ടികള്‍ക്കായി മൂന്ന് ഗ്രൂപ്പുകളിലായി ലെവല്‍ വണ്‍, ലെവല്‍ ടു, ലെവല്‍ ത്രീ വിഭാഗങ്ങളിലായി ആണ്‍കുട്ടികള്‍ക്കും പെണ്‍കുട്ടികള്‍ക്കും മത്സരങ്ങള്‍ നടന്നു.
300 ഓളം കായികതാരങ്ങള്‍ ചാമ്പ്യന്‍ഷിപ്പില്‍ പങ്കെടുത്തു. കോട്ടയം എംഡി സെമിനാരി എല്‍പി സ്കൂൾ ഓവറോള്‍ ചാമ്പ്യന്മാരായി. ഗവണ്‍മെന്‍റ് എച്ച്എസ്എസ് ഇടക്കുന്നം 131 പോയിന്‍റുമായി രണ്ടാം സ്ഥാനവും 127 പോയിന്‍റുമായി ഹോളി ഫാമിലി യുപിഎസ് ഇഞ്ചിയാനി മൂന്നാം സ്ഥാനവും നേടി.
രാവിലെ നടന്ന ഉദ്ഘാടന സമ്മേളനത്തില്‍ അല്‍ഫോന്‍സാ കോളജ് പ്രിന്‍സിപ്പല്‍ റവ.ഡോ. ഷാജി ജോണ്‍ ചാമ്പ്യന്‍ഷിപ്പ് ഉദ്ഘാടനം ചെയ്തു. കോളജ് ബര്‍സാര്‍ ഫാ. കുര്യാക്കോസ് വെള്ളച്ചാലില്‍ അധ്യക്ഷനായി.
വൈകുന്നേരം നടന്ന സമാപന സമ്മേളനത്തില്‍ കോട്ടയം ജില്ല അത്ലറ്റിക് അസോസിയേഷന്‍ പ്രസിഡന്‍റ് ഫാ. മാത്യു കരീത്ര സമ്മാന ദാനം നിര്‍വഹിച്ചു.
സെക്രട്ടറി ഡോ. തങ്കച്ചന്‍ മാത്യു, ഡോ. സിനി തോമസ്, റോയി സ്‌കറിയ, വി.സി. അലക്‌സ്, റോഷന്‍ ഐസക് ജോണ്‍, കെ.എം. സുധീഷ് എന്നിവര്‍ പ്രസംഗിച്ചു.
