കൊച്ചി: ആരോഗ്യ ചികിത്സാ മേഖലയിലെ പണക്കൊതിക്കെതിരേ ജാഗ്രത വേണമെന്നും മറ്റു തൊഴിൽ മേഖലകളെപ്പോലെ ഇതും ഉപഭോക്തൃവത്കരണത്തിന്റെ ഭാഗമായി മാറുകയാണെന്നും ഹൈക്കോടതി.
മെഡിക്കൽ സർവീസിലുള്ള ഡോക്ടമാർ സാന്പത്തികനേട്ടമുള്ള പദവികളും മെച്ചപ്പെട്ട മേച്ചിൽപുറങ്ങളും തേടി സ്വകാര്യ മേഖലയിലേക്കും വിദേശങ്ങളിലേക്കും ചേക്കേറുന്പോൾ പാവപ്പെട്ടവന് മികച്ച ചികിത്സ നഷ്ടപ്പെടുകയാണെന്നും അന്യായമായി അവധിയിൽ തുടരുന്ന 75 ലേറെ ഡോക്ടർമാർക്കെതിരേ നടപടിയെടുക്കുന്നതു സർക്കാർ പരിശോധിച്ചു വരികയാണെന്നും ഹൈക്കോടതി പറഞ്ഞു.
അനധികൃത അവധിയെടുത്തെന്ന പേരിൽ സർവീസിൽനിന്നു പിരിച്ചുവിട്ട കോഴിക്കോട് മെഡിക്കൽ കോളജിലെ ഓർത്തോപീഡിക് വിഭാഗം അസോ. പ്രഫ. പി. ഗോപിനാഥനെ തിരിച്ചെടുക്കാൻ കേരള അഡ്മിനിസ്ട്രേറ്റീവ് ട്രൈബ്യൂണൽ ഉത്തരവിട്ടതിനെതിരേ സർക്കാർ നൽകിയ അപ്പീൽ ഉൾപ്പെടെ പരിഗണിച്ചാണു ഡിവിഷൻ ബെഞ്ച് ഇക്കാര്യം പറഞ്ഞത്.
2010 ഫെബ്രുവരി 20 മുതൽ അന്യായമായി അവധിയിലാണെന്നു വിലയിരുത്തിയാണ് ഡോ. ഗോപിനാഥനെ പിരിച്ചുവിട്ടത്. അഡ്മിനിസ്ട്രേറ്റീവ് ട്രൈബ്യൂണൽ ഡോക്ടറെ തിരിച്ചെടുക്കാൻ ഉത്തരവിട്ടു. കിടപ്പിലാണെന്നു പറഞ്ഞ സമയത്തു ഡോക്ടർ അമേരിക്കയിലേക്കു പോകാൻ വീസ തേടിയിരുന്നെന്നും വിദേശത്തേക്ക് ഉപരിപഠനത്തിനു പോകാൻ അനുമതി തേടിയിരുന്നെന്നും ചൂണ്ടിക്കാട്ടിയാണു സർക്കാർ അപ്പീൽ നൽകിയത്.
