സ്വന്തം ലേഖകൻ
തൃശൂർ: സർക്കാർ ആശുപത്രിയിലെ ഡോക്ടർമാരുടെ സമരം തൃശൂർ ജില്ലയിൽ പൂർണം. 121 സർക്കാർ ആശുപത്രികളാണ് ജില്ലയിലുള്ളത്. ഇതിൽ തൃശൂർ കോർപറേഷൻ ജനറൽ ആശുപത്രിയിൽ രാവിലെ എത്തിയ രോഗികളെ അഞ്ചു ഡോക്ടർമാർ പരിശോധിച്ചു. അത്യാഹിത വിഭാഗത്തിനു സമീപത്തിരുന്നാണ് ഡോക്ടർമാർ രോഗികളെ പരിശോധിച്ചത്.
ഇവർ ഒപ്പിടാതെയാണ് ഡ്യൂട്ടി ചെയ്തത്. ഉച്ചയ്ക്ക് ഒരു മണിവരെ രോഗികളെ പരിശോധിക്കുമെന്ന് ഡോക്ടർമാർ പറഞ്ഞു. സമരമാണെന്നറിയാതെ എത്തിയ രോഗികളെ മടക്കി അയക്കാതെ ഇവർ പരിശോധിക്കുകയായിരുന്നു.മറ്റു ആശുപത്രികളിൽ ഒപി വിഭാഗങ്ങളിൽ എത്തിയ രോഗികൾ സമരം മൂലം വലഞ്ഞു.
