റാന്നി: ചത്ത നായയെ ജീവനുള്ള നായ ചങ്ങലയില്‍ വലിച്ചിഴച്ചുകൊണ്ടുവന്നത് സമൂഹമാധ്യമങ്ങള്‍ ഏറ്റെടുത്തതോടെ സംഭവത്തില്‍ അന്വേഷണം നടത്തി പോലീസും മൃഗസ്‌നേഹികളും.
വെച്ചൂച്ചിറ ചാത്തന്‍തറയ്ക്കു സമീപം പതിനഞ്ചാംപടിയിലാണ് സംഭവം അരങ്ങേറിയത്. പുത്തേട്ട് വീട്ടില്‍ റോയി എന്നയാളുടെ വീട്ടില്‍ പൂട്ടിയിട്ടിരുന്ന നായയുടെ സമീപം ഇന്നലെ രാവിലെ എത്തിയ തെരുവുനായ ചങ്ങലയില്‍ കുരുങ്ങുകയും പരസ്പരം കടിക്കാനൊരുങ്ങുകയും ചെയ്തു.
തുടര്‍ന്ന് നായകളെ രക്ഷിക്കാന്‍ വീട്ടുടമ ചങ്ങല അഴിച്ചു വിടുകയായിരുന്നുവെന്ന് പറയുന്നു.
ചങ്ങല അഴിച്ചതോടെ തെരുവു നായയെ വലിച്ചു കൊണ്ട് നായ പുറത്തേക്ക് ഓടുകയായിരുന്നു. ചങ്ങലയില്‍ കുരുങ്ങിയ തെരുവുനായ ഇതിനിടെ ചത്തു.
ചങ്ങല കുരുങ്ങി വയറു മുറുകി വേദന കൊണ്ട് പുളയുന്ന ജീവനുള്ള നായയെ രക്ഷിക്കാനുള്ള നാട്ടുകാരുടെ ശ്രമം പരാജയപ്പെടുകയും രക്ഷിക്കാന്‍ ശ്രമിച്ച പ്രദേശവാസിയായ പഴയംപാട്ട് ചന്ദ്രന് നായയുടെ കടിയേല്‍ക്കുകയുമുണ്ടായി.
വിവരമറിഞ്ഞ് വെച്ചൂച്ചിറ പോലീസ് സ്ഥലത്തെത്തി പ്രദേശവാസികളുടെ മൊഴി രേഖപ്പെടുത്തി. അന്വേഷണത്തില്‍ ജന്തുദ്രോഹ നിയമപ്രകാരം കേസെടുക്കാനാകില്ലെന്ന് പോലീസ് പറഞ്ഞു.
