ന്യൂഡൽഹി: കോൺഗ്രസ് നേതാവ് രാഹുൽ ഗാന്ധി പട്ടിക്കുട്ടിക്ക് മുസ്ലിം പേരിട്ടതിനെ വിമർശിച്ച് ഓൾ ഇന്ത്യ മജ്‌ലിസെ ഇത്തേഹാദുൽ മുസ്‌ലിമീൻ (എഐഎംഐഎം) നേതാവ് മുഹമ്മദ് ഫർഹാൻ. രാഹുൽ ഗാന്ധി ഗോവയിൽനിന്ന് പുതുതായി എത്തിച്ച നായ്ക്കുട്ടികളിലൊന്നിന് “നൂറി’ എന്നാണ് പേരിട്ടത്.
നായ്ക്കുട്ടിക്ക് മുസ്ലിം പേരിട്ടത് മുസ്ലിം പെൺകുട്ടികളോടുള്ള അപമാനമാണെന്ന് എഐഎംഐഎം ആരോപിച്ചു. മൂന്ന് മാസം പ്രായമുള്ള ജാക്ക് റസൽ ടെറിയർ നായ്ക്കുട്ടിക്കാണ് നൂറി എന്ന് പേരിട്ടത്.
ഗോവയിൽനിന്നു നായ്ക്കുട്ടിയെ ദത്തെടുത്ത് അമ്മ സോണിയാ ഗാന്ധിക്ക് സമ്മാനമായി നൽകിയത് രാഹുൽ തന്‍റെ യൂട്യൂബ് ചാനലിൽ പങ്കുവച്ചിരുന്നു.
നൂറി ഗോവയിൽനിന്ന് ഞങ്ങളുടെ കൈകളിലേക്ക് എത്തിയെന്നും ഞങ്ങളുടെ ജീവിതത്തിന്‍റെ വെളിച്ചമായി അവൾ മാറിയെന്നും രാഹുൽ വീഡിയോയിൽ പറഞ്ഞു. സോണിയാ ഗാന്ധിയുടെ മറ്റൊരു വളർത്തു നായയായ “ലാപ്പോ’യെയും ഗോവയിൽനിന്നാണ് കൊണ്ടുവന്നത്.
