ഷാജഹാന്‍പുർ(യുപി): പ്രാവിനെ ഉപയോഗിച്ച് കടയില്‍നിന്നു സാധനങ്ങള്‍ വാങ്ങിക്കുന്ന യുവാവിന്‍റെ വീഡിയോ സമൂഹമാധ്യമങ്ങളിൽ അതിശയം പടർത്തി.
ഉത്തര്‍പ്രദേശിലെ ഷാജഹാന്‍പുർ സ്വദേശിയായ ഗുല്‍സാർ ഖാന്‍ എന്ന യുവാവാണ് തന്‍റെ വളര്‍ത്തുപ്രാവിനെ കടയില്‍ വിട്ട് സാധനങ്ങൾ വാങ്ങുന്നത്. ഇതിന്‍റെ വീഡിയോ ഗുല്‍സാർതന്നെ പുറത്തുവിട്ടു.
പ്രാവിനോട് കടയില്‍നിന്നു സാധനങ്ങള്‍ വാങ്ങിവരാന്‍ യുവാവ് ആവശ്യപ്പെടുന്നത് വീഡിയോയിൽ കാണാം. തുടർന്ന് പ്രാവിന്‍റെ കഴുത്തില്‍ സാധനങ്ങളുടെ ലിസ്റ്റും പണവുമടങ്ങിയ ഒരു പ്ലാസ്റ്റിക് കവർ ഇട്ടശേഷം പറത്തി വിടുന്നു.
പ്രാവ് ഇടുങ്ങിയ വീടുകള്‍ക്കിടയിലൂടെ പറന്ന് കടയിലെത്തുമ്പോള്‍ കടക്കാരി പ്രാവിനെ പിടിച്ചെടുത്ത് അതിന്‍റെ കഴുത്തിലെ കവറിലുള്ള ലിസ്റ്റ് വായിക്കുന്നു.
അതിൽ പറഞ്ഞ സാധനങ്ങൾ കവറിലിട്ടശേഷം കവറിലുണ്ടായിരുന്ന പണമെടുത്ത് ബാക്കി തിരികെ വയ്ക്കുന്നു. അതോടൊപ്പം കവർ പ്രാവിന്‍റെ കഴുത്തില്‍തന്നെ ഇടുന്നു. പ്രാവ് വീണ്ടും പറന്ന് യുവാവിന്‍റെ അടുത്തെത്തുന്നതും അയാൾ കവര്‍ പുറത്തെടുക്കുന്നതും വീഡിയോയിലുണ്ട്.
വീഡിയോ വളരെ പെട്ടെന്നാണു വൈറലായത്. ‘ഈ പ്രാവ് സ്വിഗ്ഗിക്കും സൊമാറ്റോ ഡെലിവറി ബോയ്സിനും ഭീഷണിയാണ്’ എന്നായിരുന്നു ഒരാളുടെ കമന്‍റ്. “ഒരു കിലോ പഞ്ചസാരയ്ക്ക് ഓർഡർ ചെയ്യട്ടെ?’ എന്നായിരുന്നു മറ്റൊരു കമന്‍റ്.
