ഡോക്ടര്‍ വന്ദനയുടെ ജീവനെടുത്ത ആക്രമം തടയുന്നതില്‍ പോലീസിന് ഗുരുതര വീഴ്ച പറ്റിയതായി ആരോഗ്യവകുപ്പിന്റെ അന്വേഷണ റിപ്പോര്‍ട്ട്.
ആശുപത്രിയിലെ സുരക്ഷാ ജീവനക്കാരും കൃത്യസമയത്ത് ഇടപെട്ടിട്ടില്ലെന്നും റിപ്പോര്‍ട്ടില്‍ പറയുന്നുണ്ട്.
റിപ്പോര്‍ട്ടില്‍ പറയുന്നതിങ്ങനെ…കൊട്ടാരക്കര താലൂക്ക് ആശുപത്രിയില്‍ അക്രമം ഉണ്ടായപ്പോള്‍ പോലീസ് പുറത്തേക്കോടി. വാതില്‍ പുറത്തു നിന്ന് അടച്ചതിനാല്‍ സന്ദീപ് അത്യാഹിത വിഭാഗത്തില്‍ അക്രമം തുടര്‍ന്നു. ആശുപത്രിയിലെ സുരക്ഷാ ജീവനക്കാരും കാര്യക്ഷമമായി ഇടപെട്ടില്ല. വന്ദന മെഡിക്കല്‍ ഓഫീസറെ കാര്യങ്ങള്‍ ധരിപ്പിക്കാന്‍ പോയ സമയത്താണ് അക്രമം നടന്നത്.
അതേസമയം, ആരോഗ്യപ്രവര്‍ത്തകരുടെ സുരക്ഷ ഉറപ്പാക്കിയുള്ള ഓര്‍ഡിനന്‍സിന് നിയമവകുപ്പിന്റെ അംഗീകാരം ലഭിച്ചു.
ആരോഗ്യവകുപ്പ് സെക്രട്ടറിയും ഡയറക്ടറും മെഡിക്കല്‍ വിദ്യാഭ്യാസ ഡയറക്ടറും ചര്‍ച്ച ചെയ്ത ശേഷമാണ് ഓര്‍ഡിനന്‍സ് വ്യവസ്ഥകള്‍ നിയമ സെക്രട്ടറി പരിശോധിച്ചത്.
മുഖ്യമന്ത്രിയുടെ അംഗീകാരത്തിന് ശേഷം ഓര്‍ഡിനന്‍സ് നാളെ മന്ത്രിസഭ പരിഗണിക്കും. ഡോക്ടര്‍മാരെ ആക്രമിക്കുന്നവര്‍ക്ക് കനത്ത ശിക്ഷയും പിഴയും ഉറപ്പാക്കുന്നതാണ് ഓര്‍ഡിനന്‍സ്.
ഇതിന് അംഗീകാരം ലഭിച്ച് കഴിഞ്ഞാല്‍ ഡോക്ടര്‍മാര്‍ക്ക് നേരെയുള്ള ആക്രമണം ജാമ്യമില്ലാ കുറ്റമാകും.
