തിരുവനന്തപുരം: കോവിഡ് പശ്ചാത്തലത്തിൽ ഡ്രൈവിംഗ് ലൈസൻസിന്‍റെയും മറ്റ് വാഹന പെർമിറ്റുകളുടെയും കാലാവധി ആറുമാസം കൂടി ദീർഘിപ്പിക്കണമെന്ന് ആവശ്യപ്പെട്ടു സംസ്ഥാന ഗതാഗതമന്ത്രി ആന്‍റണി രാജു, കേന്ദ്രമന്ത്രി നിതിൻ ഗഡ്കരിക്ക് കത്തു നൽകി.
ഡ്രൈവിംഗ് ലൈസൻസ്, രജിസ്ട്രേഷൻ സർട്ടിഫിക്കറ്റ്, ഫിറ്റ്നസ് സർട്ടിഫിക്കറ്റ് തുടങ്ങി കേന്ദ്ര വാഹന നിയമത്തിലെ ബന്ധപ്പെട്ട രേഖകളുടെ കാലാവധി ദീർഘിപ്പിച്ചു നൽകണമെന്നാണ് ആവശ്യപ്പെട്ടത്.
കോവിഡ് മഹാമാരി കണക്കിലെടുത്ത് മുൻപ് ദീർഘിപ്പിച്ച കാലാവധി സെപ്റ്റംബർ 30ന് അവസാനിക്കും.കോവിഡ് പ്രശ്നങ്ങൾ തുടരുന്നതിനാൽ ജനങ്ങൾക്ക് വാഹന സംബന്ധമായ രേഖകൾ പുതുക്കുന്നതിനുള്ള ബുദ്ധിമുട്ടുകൾ കണക്കിലെടുത്താണ് കേന്ദ്രത്തെ സമീപിച്ചതെന്നു മന്ത്രി പറഞ്ഞു.
