കാക്കനാട്: ഡ്രൈവിംഗ് ടെസ്റ്റ് പാസായ സന്തോഷവാർത്ത വാഹനമോടിക്കുന്നതിനിടെ മൊബൈൽഫോണിലൂടെ വിളിച്ചറിയിച്ച കാക്കനാട് സ്വദേശിയുടെ ലൈസൻസ് മോട്ടോർവാഹന വകുപ്പ് അധികൃതർ മിനിറ്റുകൾക്കകം തിരികെവാങ്ങി. ഡ്രൈവിംഗ് ടെസ്റ്റ് പാസായ സന്തോഷത്തിൽ തിരിച്ചു കാർ ഡ്രൈവ് ചെയ്തു പോകുന്പോൾ ഫോണിൽ സംസാരിക്കുന്നത് മോട്ടോർ വെഹിക്കിൾ ഇൻസ്പെക്ടറുടെ കണ്ണിൽപ്പെട്ടതാണ് വിനയായത്.
ടെസ്റ്റ് പാസായി ഒരു മണിക്കൂറിനുള്ളിലാണ് മോട്ടോർ വാഹന നിയമ ലംഘനത്തിന്‍റെ പേരിൽ ലൈസൻസ് തടഞ്ഞുവച്ചത്. ലൈസൻസ് സസ്പെൻഡ് ചെയ്യാവുന്ന കുറ്റമാണിതെന്ന് മോട്ടോർ വാഹന വകുപ്പ് അധികൃതർ പറഞ്ഞു. ഇന്നലെ രാവിലെ കാക്കനാട് ഡ്രൈവിംഗ് ടെസ്റ്റ് പാസായി ഗ്രൗണ്ടിൽ നിന്ന് ഇറങ്ങുന്പോഴായിരുന്നു സംഭവം. ലൈസൻസിൽ ഒപ്പിട്ടിട്ടുള്ള ഉദ്യോഗസ്ഥന്‍റെ മുമ്പിലൂടെയാണ് മൊബൈൽ ഫോണിൽ സംസാരിച്ചുകൊണ്ട് യുവാവ് കാർ ഓടിച്ച് പോയത്. കൈയോടെ പിടികൂടി ഇയാളോട് വൈകുന്നേരം ഓഫീസിൽ ഹാജരാകാൻ നിർദേശിക്കുകയായിരുന്നു. വൈകുന്നേരം നാലിന് ആർടി ഓഫീസിലെത്തി ലൈസൻസ് കൈപ്പറ്റി എംവിഐ എൽദോ വർഗീസിനടുത്ത് ഹാജരായി.
ലൈസൻസ് തിരികെ വാങ്ങിയ എംവിഐ യുവാവിന്‍റെ ലൈസൻസ് സസ്പെൻഡ് ചെയ്യുന്നത് ഉൾപ്പെടെയുള്ള നടപടികൾക്കായി ജോയിന്‍റ് ആർടിഒയ്ക്ക് റിപ്പോർട്ട് നൽകി. അനിൽകുമാറിനോട് അടുത്ത ബുധനാഴ്‌ച 10ന് ജോയിന്‍റ് ആർടിഒ മുമ്പാകെ ഹാജരാകാൻ നിർദേശിക്കുകയായിരുന്നു. ഒരു വർഷം വരെ ലൈസൻസ് സസ്പെൻഡ് ചെയ്യാവുന്ന കുറ്റമാണിതെന്ന് എൽദോ വർഗീസ് പറഞ്ഞു.
