സെന്റ് ഓഫ് പരിപാടിയ്ക്ക് അടിച്ചുപൂസായി എത്തിയ പത്താംക്ലാസ് വിദ്യാര്‍ഥികള്‍ സ്‌കൂളിനാകെ നാണക്കേടായി. ഇവര്‍ നാട്ടുകാര്‍ക്കും തലവേദനയായതോടെ പോലീസെത്തിയാണ് പ്രശ്്‌നം പരിഹരിച്ചത്. കൊടുങ്ങല്ലൂര്‍ താലൂക്ക് പരിധിയില്‍പ്പെടുന്ന സ്‌കൂളിലെ പത്താം ക്ലാസ് വിദ്യാര്‍ത്ഥികളാണ് മദ്യപിച്ച് സെന്റ് ഓഫിനെത്തിയത്.
നാനൂറോളം വിദ്യാര്‍ഥികളാണ് ഇത്തവണ പത്താംക്ലാസില്‍ നിന്ന് പടിയിറങ്ങുന്നത്. പരിപാടികള്‍ തുടങ്ങിയപ്പോഴേ പലരും നിന്ന് ആടാന്‍ തുടങ്ങി.
സ്‌കൂളില്‍ നിന്ന് തൊട്ടടുത്ത കവല വരെ വിദ്യാര്‍ത്ഥികളും വിദ്യാര്‍ത്ഥിനികളും പങ്കെടുത്ത ഘോഷയാത്രയും ഉണ്ടായിരുന്നു വാദ്യമേളങ്ങളുടെയും വര്‍ണ്ണങ്ങള്‍ വിതറിയുമായിരുന്നു ഘോഷയാത്ര.
എന്നാല്‍ രാവിലെ തന്നെ നല്ല ഫോമിലായ പല വിദ്യാര്‍ഥികള്‍ക്കും ഘോഷയാത്രയില്‍ കാലുറച്ചില്ല. ചിലര്‍ റോഡരുകില്‍ നിന്ന പോസ്റ്റില്‍ ചാരിയാണ് നിന്നത്. ആഘോഷങ്ങള്‍ അതിരു വിട്ടതോടെ ബന്ധപ്പെട്ടവര്‍ കയ്പമംഗലം പൊലീസിനെ വിവരം അറിയിച്ചു. പൊലീസെത്തിയതോടെയാണ് വിദ്യാര്‍ത്ഥികള്‍ ശാന്തരായത്.
രണ്ട് വിദ്യാര്‍ത്ഥികളെ രക്ഷിതാക്കള്‍ എത്തിയാണ് വീട്ടിലേക്ക് കൊണ്ട് പോയത്. പതിനഞ്ച് വയസുള്ള കൗമാരങ്ങള്‍ കാട്ടിക്കൂട്ടിയ പേക്കൂത്തുകളില്‍ കണ്ട് നാട്ടുകാരും അന്ധംവിട്ടിരിക്കുകയാണ്.
വിദ്യാര്‍ത്ഥികളില്‍ മദ്യത്തിന്റെയും മയക്ക് മരുന്നിന്റെയും ഉപയോഗം വര്‍ദ്ധിക്കുന്നതിന് തെളിവായി മാറുകയായിരുന്നു ഈ സെന്റ് ഓഫാഘോഷം. സ്‌കൂള്‍ വിദ്യാര്‍ഥികളില്‍ മദ്യത്തിന്റെയും മയക്കുമരുന്നിന്റെയും ഉപയോഗം വര്‍ധിച്ചുവരുന്ന വാര്‍ത്തകള്‍ക്കിടയിലാണ് പുതിയ സംഭവം അരങ്ങേറിയിരിക്കുന്നത്.
