കൊച്ചി: കിഫ്ബി മസാലബോണ്ട് കേസിൽ മുൻ ധനമന്ത്രി തോമസ് ഐസക്കിന് വീണ്ടും എൻഫോഴ്സ്മെന്റ് ഡയറക്ടറേറ്റി (ഇഡി) ന്‍റെ നോട്ടീസ്.
11-ന് രാവിലെ കൊച്ചിയിലെ ഇഡി ഓഫീസിൽ ചോദ്യം ചെയ്യലിന് ഹാജരാകാനായാണ് രണ്ടാം തവണയും ഇഡി നോട്ടീസ് നൽകിയിരിക്കുന്നത്.
ജൂലൈ 19-ന് ഹാജരാകാൻ നോട്ടീസ് നൽകിയിരുന്നെങ്കിലും അദേഹം ഹാജരായില്ല. തപാലിൽ അയച്ച നോട്ടീസ് കിട്ടിയില്ലെന്നു പറഞ്ഞതിനെത്തുടർന്ന് ഇ-മെയിൽ മുഖാന്തരം ഇഡി നോട്ടീസ് നൽകി.
മറ്റു ചില പരിപാടികൾ ഉള്ളതിനാൽ ഹാജരാകാനാവില്ലെന്നു തോമസ് ഐസക് മറുപടിയും നൽകിയിരുന്നു. കിഫ്ബി സിഇഒ, ഡെപ്യൂട്ടി മാനേജിംഗ് ഡയറക്ടർ എന്നിവർക്ക് രണ്ടു തവണ നോട്ടീസ് അയച്ചെങ്കിലും അവരും ഹാജരായില്ല.
പിന്നീട് ഇഡി അതീവ രഹസ്യമായി ഇവരിൽ നിന്ന് മൊഴിയെടുക്കുകയായിരുന്നു. ഇതിന്‍റെ ഭാഗമായാണ് തോമസ് ഐസക്കിനെയും വിളിപ്പിച്ചിരിക്കുന്നതെന്നാണ് വിവരം.
